Халааны көрсө сүөһү-сылгы куттала суох сиргэ таһаарылынна
Тыа хаһаайыстыбатын министиэристибэтэ сааскы халаан уутун сүтүгэ суох аһардар туһугар дьаһаллары эрдэттэн бэлэмнээбитэ.
edersaas.ru
Ол курдук, өрүстэр сүнньүлэригэр сытар 14 улуус 51 нэһилиэгэр нэһилиэктэр пааспардара, ууга барар кутталлаах эбийиэктэр испииһэктэрэ, сүөһүнү-сылгыны уу ылбат сиригэр таһаарыы былаана оҥоһуллубута итиэннэ быстах хаайар 93 пууҥҥа от-бурдук тиэрдиллибитэ. Тыа хаһаайыстыбаларын управлениеларын, дьаһалталар исписэлиистэрэ, хаһаайыстыбалар салайааччылара халааны утары дьаһаллары тэрийиигэ үөрэммиттэрэ.
Миниистир Александр Атласов иһитиннэрбитинэн, күн бүгүн 27 827 ынах сүөһү, 31 312 сылгы үөһэ, уу ылбат сиригэр, быстах хаайар пууннарга таһаарылынна. Төгүрүк сууккалаах дьуһуурустуба Бүлүү, Горнай, Мэҥэ Хаҥалас, Нам, Ньурба, Таатта, Томпо, Хаҥалас, Уус Алдан, Уус Маайа, Үөһээ Бүлүү улуустарыгар уонна Дьокуускай куоракка тэрилиннэ. Бырабыыталыстыба суһал бөлөҕүн састаабыгар киирсэн, министиэристибэ үс эппиэттээх үлэһитэ Аммаҕа, Алдаҥҥа уонна Тааттаҕа үлэлии сылдьаллар.
Раиса Сибирякова, «Саха сирэ» хаһыат, edersaas.ru