Аммаҕа муус харан, Чурапчы улууһугар Мырылаҕа, Таатта Харбалааҕар уонна Даайа Амматыгар дьон дьиэтин, социальнай эбийиэктэри уу ылла. Амма, Чурапчы, Хаҥалас, Таатта, Нам улуустарыгар 95 киһилээх федеральнай уонна региональнай быыһааччылар үлэлии сылдьаллар. Нэһилиэнньэҕэ тустаах көмө оҥоһуллар.
edersaas.ru
«Таатта оройуона” МТ дьаһалтатыгар төгүрүк суукка ыксаллаах кэмҥэ үлэлиир суһал штаб тэрилиннэ. Нэһилиэнньэни сэрэтэр, ханна куоталларын биллэрэр үлэ ыытыллан, 290 миэстэлээх быстах кэмҥэ олорор пуун хааччылынна.
Чурапчыга балаһыанньа уустугурдаҕына, 170 миэстэлээх икки быстах кэмҥэ олорор сир дьону көрсүөхтэрэ.
Тааттаҕа икки сиринэн уопсайа 99 киһи, онтон 34 оҕо быстах кэмҥэ олорор сиргэ халаан уутуттан куотан киирдилэр.
Быстах кэмҥэ олорор сирдэр аһынан-үөлүнэн, эминэн-томунан, бастакы туттар тэрилинэн хааччыллыылаахтар. Манна медицинэ үлэһиттэрэ, психологтар дьуһуурустубалыыллар, ону таһынан, общественнай бэрээдэги харабыллыыллар.
Халаан уута ааһар кэмигэр ыксаллаах түгэн тирээтэҕинэ, ЫБММ күнүстэри-түүннэри үлэлиир 39-99-99 төлөпүөнүгэр эрийэн, кыһалҕалаах дьон сүбэ-ама ылыахтарын сөп.
Халаан уута ааһар кэмигэр кустуу барартан, айылҕаҕа тахсартан туттунаргытыгар сүбэлииллэр.
Марианна ТЫРТЫКОВА, «Саха сирэ», edersaas.ru