СӨ бырабыыталыстыбатын бэрэссэдээтэлин бастакы солбуйааччы Алексей Колодезников улуус баһылыктара кыттыылаах Ыксаллаах быһыыны-майгыны сэрэтэр уонна туоратар итиэннэ өрөспүүбүлүкэҕэ баһаартан куттал суох буолуутун хааччыйар хамыыһыйа мунньаҕын ыытта.
Тэрээһиҥҥэ Саха сиригэр сааскы халаан куттала суох ааһытын көрдүлэр. Ыам ыйын 18 күнүнээҕи туругунан, Өлүөнэ өрүскэ муус саамай хойуутук Кэбээйи оройунан устар. Алын кирбии Сангар бөһүөлэгин аллара өттүнэн бэлиэтэнэр. Алдан өрүс – Уус Алдан, Бүлүү – Бүлүү улууһунан, Халыма – Үөһээ Халыма улуустарынан ааһар. Яна уонна Индигииркэ өрүстэргэ уу таһыма тахсара бэлиэтэнэр.
Мунньах кэмигэр сааскы халаан уонна ылыллар миэрэлэр тустарынан Үөһээ Халыма, Кэбээйи, Орто Халыма, Уус Алдан салайааччылара иһитиннэрдилэр. Сааскы халаан содулун туоратыыга уонна чөлүгэр түһэрэр үлэни тэрийэр дириэксийэ барыллаан ааҕыытынан, 7 улууска уонна куорат уокуругар 19 нэһилиэнньэлээх пуун эмсэҕэлээбит. Бүгүҥҥү күҥҥэ нэһилиэнньэҕэ ирдэниллэр көмө суумата 7 мөлүйүөн солкуобайтан тахса суумаҕа тиийбит. Ол иһигэр бастакы кэмҥэ туһаныллар үп-мал хорумньутун толуйууга көрүллэр биир кэмнээх көмө уонна харчынан көмө буолар.
“Халааҥҥа эмсэҕэлээбит өрөспүүбүлүкэ олохтоохторугар харчынан көмө хойутааһына суох төлөнүөхтээх, номнуо бу нэдиэлэҕэ”, — диэн Колодезников баһылыктарга туһаайан бэлиэтээтэ.
Алексей Колодезников сорудаҕынан, СӨ Тырааныспарка министиэристибэтэ сотору кэминэн ууттан алдьаммыт суоллары чөлүгэр түһэрии былаанын киллэриэхтээх.
СӨ И Дарханын уонна Бырабыыталыстыбатын пресс-сулууспата.
Хаартыска: Андрей СОРОКИН (СИА).