Бэс ыйын 20 күнүнээҕи туругунан, халааҥҥа ылларбыт улуустарга көмөҕө анаан Олоххо-дьаһахха куттал суох буолуутун хааччыйар судаарыстыбаннай кэмитиэт иһинэн аһыллыбыт анал счекка 20,5 мөл. солк. харчы хомулунна. Биир дойдулаахтар түмсүүлэрэ аһымал аахсыйалары тэрийэн, үп-харчы, мал-сал, таҥас-сап хомуйаллар. Ол түмүгэр, барыта холбоон 40 туонна кэриҥэ мал-сал уонна туттар тэрил хомуллан, тиэрдилиннэ.
edersaas.ru.
Березовкаҕа — саҥа ДЭС
Киин куоракка олорор Орто Халыматтан төрүттээх дьон түмсүүлэрэ (сал. Галина Иванова, Анастасия Самсонова) Опера уонна балет тыйаатыгар кэнсиэри уонна араас аахсыйалары тэрийэн, 430 тыһ. солк. харчыны хомуйан улууска туттардылар, итиэннэ 175 киилэ гуманитарнай көмөнү ууттан эмсэҕэлээбит Березовка олохтоохторугар ыыттылар.
Березовкаҕа чөлүгэр түһэрэр үлэ көхтөөхтүк саҕаланна. Ол курдук, “Сахаэнерго” АУо бөһүөлэги уу ылбат сиригэр көһөрүү бырагырааматын чэрчитинэн, саҥа дизельнэй электростанцияны үлэлэттэ. Билиҥҥитэ дизель уматыгын уурар ыскылааты тутуу түмүктэннэ, электричествоны биэрэр 400 миэтэрэ усталаах, 0,4 кВ-аах салгын ситимэ тутулунна, аны чаҕылҕаны аһарар тэрили таҥар үлэтэ барар. Бу дьоһун тутуу 2019 с. түмүктэниэхтээх, кэлэр сыл бастакы кыбаарталыгар хаалбыт кыра үлэлэр ситэриллиэхтэрэ.
Кальвицаҕа тутар этэрээт үлэлиир
Үрдүк уонна орто анал үөрэх кыһаларын устудьуоннарын тутар этэрээттэрэ улуустарга тиийбиттэрэ. Холобур, Кэбээйи улууһун Кальвицатыгар уон тоҕус байыастаах “Океан” тутар этэрээт тиийэн үлэлии сылдьар.
Туйаара Биленкова, Кальвица олохтооҕо, учуутал:
— Устудьуоннар кэлэн, бэркэ үлэлии-хамсыы сылдьаллар. Билигин саҥа тутуллар бөһүөлэккэ баһаартан сэрэхтээх буолуу ирдэбилинэн, тыаны солоон, мини-балаһаны оҥоро сылдьаллар. Бу иннинэ кырдьаҕас ыаллар дьиэлэрин чөлүгэр түһэрэргэ көмөлөспүттэрэ. Халаан уута улахан хоромньуну таһаарда. Ыаллар дьиэбитин-уоппутун куурдуна, өрө тарда итиэннэ оҕуруоппутун, хортуоппуйбутун олордо сылдьабыт. Быйыл саҥа бөһүөлэккэ көһөөрү, онно туттар дьиэбитин ситэрээри, сакаастаабыт матырыйаалбыт баарсанан аҕалылларын кэтэһэбит. Өрөспүүбүлүкэттэн көрүллэр көмө харчы кэлэн эрэр.
Ыйаах толорулларынан күүстээх
Ил Дархан э.т. Айсен Николаев ыам ыйын 30 күнүгэр таһаарбыт халаан содулун туоратар туһунан ыйааҕар, быйылгы сыл сүрүн соругунан халаантан эмсэҕэлээбит нэһилиэнньэлээх пууннары чөлүгэр түһэрии итиэннэ дьоҥҥо-сэргэҕэ көмөнү тэрийии буоларын ыйбыта.
Раиса Сибирякова, “Саха сирэ” edersaas.ru.