Халаан: Москваттан “Россельхозцентр” дириэктэрин солбуйааччы Дмитрий Говоров кэллэ

Дьокуускайга бэҕэһээ Россия федерациятын Тыатын хаһаайыстыбатын министиэристибэтин “Россельхозцентр” федеральнай судаарыстыбаннай бүддьүөт тэрилтэтин дириэктэрин солбуйааччы Дмитрий Говоров кэллэ. 

Кини халаан уутугар алдьаммыт тыа хаһаайыстыбатын эбийиэктэрин чөлүгэр түһэрии ороскуотун ааҕыыга докумуоннары оҥорууга көмөлөһөр соруктаах. Кэлбит күнүгэр Хаҥалас улууһун Төхтүрүгэр ууттан эмсэҕэлээбит эбийиэктэргэ сырытта итиэннэ хоромньуну ааҕар хамыыһыйа чилиэннэригэр семинар ыытта. Бу улууска сэрэтэр үлэ эрдэттэн ыытыллан, 2296 ынах сүөһү, 3049 сылгы уу ылбат сиригэр таһаарыллан, биир да сүөһү-сылгы былдьамматаҕа эрээри, үлэ эбийиэктэрэ балачча эмсэҕэлээбиттэрэ. Дмитрий Говоров бүгүн Амма улууһугар үлэлиэҕэ.

Билигин хамыыһыйалар тахсыбыт ороскуоту ааҕа сылдьаллар. Улуустар тыа хаһаайыстыбатын хоромньутун (сүөһү өлүүтүн, хотон, астыыр сыах уо.д.а. алдьаныытын) туһунан бастааҥҥы докумуоннары бэс ыйын 1 күнүгэр диэри Тыа хаһаайыстыбатын уонна ас-үөл бэлиитикэтин министиэристибэтигэр түһэриэхтээхтэр. Министиэристибэ үлэһиттэрэ ону чопчулаан, чуолкайдаан бараннар, “Россельхозцентрга” туттаран, эмсэҕэлээбиттэргэ көмө үбү федерацияттан көрдөрөллөр.

Раиса СИБИРЯКОВА, “Саха сирэ» edersaas.ru