Айылҕа харыстабыла Суолталаах

Халаан: Ил Түмэн дьокутаата хоролорго көмөлөстө

Халаан уутугар түбэспит Өлүөхүмэ улууһун Хоро сэлиэнньэтэ бүгүн хайдах чөлүгэр түһэн эрэрин туһунан нэһилиэк дьаһалтатын баһылыга Анатолий Лыткины кытта төлөпүөнүнэн кэпсэттибит.

  Хоро Өлүөхүмэттэн 80 км таҥнары сытар.  Суолун-ииһин усулуобуйатынан уустук суоллаах-иистээх  нэһилиэктэр ахсааннарыгар киирсэр. Онно Балаҕаннаах уонна Хоро киирэллэр. Бу халаан кэмигэр Балаҕаннаахха 3 ыал, Хороҕо 55 ыал эмсэҕэлээтэ. Итинтэн 31 ыал улаханнык эмсэҕэлээтэ диэн ааҕылынна. Икки ыал дьиэлэрин түннүгүн үөһээ өттүгэр диэри уу ылбыта. Билигин биирдиилээн ыалларынан, ууга ыла сылдьыбыт эбийиэктэринэн сиһилии учуот-ахсаан үлэтэ ыытыллар. Социальнай эбийиэктэртэн оскуола мастарыскыайа барбыта. Дэриэбинээҕэ киин соҕотох хочуолунайдаахпыт, онтукабыт двигателлэрэ уу анныгар киирэн таҕыстылар. Билигин ону өһүлүү, куурдааһын үлэтэ барар. Ону тэҥэ ититэр ситим 600 миэтэрэ трассата ууга киирэн таҕыста. Сылааһы тутар тас бүрүөһүнэ илийдэ, онон кыстыкка киириэххэ диэри чөлүгэр түһэриэхтээхпит. 9 км курдук умнас суола эмиэ ууга ылларбыта. Хороҕо Набережнай  уулуссабыт улаханнык ууга барбыта. Онон 340 миэтэрэ курдук уһуннаах уулуссаны өрөмүөннүөххэ наада.

Бу айылҕа иэдээнигэр түбэспит нэһилиэккэ Ил Түмэҥҥэ дьокутааппыт Оксана Михайлова 6 носуоһу булан ыытта, Ыччат отдела эмиэ носуос ыытыахтаах. Бу кэлбит носуостары ууга барбыт тиэргэннээх, дьиэлээх ыалларбытыгар бөлөхтөтөлөөн, илдьэ сылдьалларыгар, быһата, бары туһаналларыгар биэриэхпит.  Дьоҥҥо көмөлөһөр сыалтан дьиэҕэ-уокка туттуллар тиэхиньикэни, таҥаһы-сабы хомуйар пуун үлэлиир. Дьокуускай куораттан биир дойдулаахтарбыт тугунан көмөлөһөбүт  диэн эрийэ тураллар. Ууттан оһохторо алдьаммыт ыалларга кирпииччэҕэ наадыйабыт. Биир ыал оһоҕо ончу сууллубута. Онуоха дьокутааппыт Оксана Михайлова бастакы баржанан кирпииччэ ыытыах буолла. Кирпииччэ кэллэҕинэ манна оһохчут дьон баар, саба түһэн тутуохтара. Ону тэҥэ халаантан эмсэҕэлээбит үлэһиттэрдээх тэрилтэлэр ол үлэһиттэригэр көмөлөһүөхтээхтэр, үлэлээбэттэргэ, кырдьаҕастарга олохтоох дьаһалта уонна волонтердар көмөлөһөбүт. Онон халаан содулун туоратыыга мантан сайын үгүс үлэ ыытыллара күүтүллэр, — диэн кэпсээтэ Анатолий Васильевич.

Онон өрөспүүбүлүкэ кыахтаах тэрилтэлэрэ, урбаанньыттара, биирдиилээн дьон хоролорго эмиэ көмөлөһүҥ.

Бэлэмнээтэ Женни Стрюкова

0
0
Telegram @edersaas20