Орто Халыма улууһугар Березовкаҕа, Налимскайга, Сыбаатайга уонна Арҕахтаахха халаан уута туох хоромньуну оҥорбутун туһунан биһиги сайпыт тиһигин быспакка сырдатар.
Күн бүгүҥҥү туругунан, улуус үрдүнэн халаантан 343 киһи, ол иһигэр 75 оҕо эмсэҕэлээбит. Уу 55 олорор дьиэни, ол иһигэр 15 элбэх кыбартыыралаах, 40 чааһынай дьиэни, биир балыыһаны, биир оҕо саадын, үс ОДЬКХ эбийиэгин, уо.д.а. эбийиэктэри ылбыт, икки муостаны, суолу-ииһи алдьаппыт. Ситэтэ суох чахчынан, 180 мөл. солк. суумалаах хоромньу тахсыбыт, Сыбаатайга уонна Арҕахтаахха уу түһэ илик буолан, онно төһө ороскуот оҥоһуллубута өссө ааҕылла илик.
Березовкаттан, Сыбаатайтан уонна Арҕахтаахтан эвакуацияламмыт 195 оҕо Дьокуускайдааҕы «Бэс чагда», «Доҕордоһуу» лааҕырдарга кэлбиттэр, сорохтор Сочига «Юбилейнай» чэбдигирдэр лааҕырга барбыттар.
Ааспыт өттүгэр олохтоохтор туруорсууларынан Березовка бөһүөлэгин уу ылбат сиригэр көһөрүү үлэтэ саҕаланан иһэн, үбүлээһинэ кыайтарбакка, тохтоон хаалбыта. Онон, быйылгы халаанынан ситимнээн, боппуруос эмиэ сөргүтүллэн, өссө күүһүрэн кэлбит. Уу 37 (22 чааһынай, 15 элбэх кыбартыыралаах) дьиэни ылбыт. Билигин уу түһэн, олохтоохтор дьиэлэрин-уоттарын куурда, чөлүгэр түһэрэ сылдьаллар. Кинилэргэ от ыйын 1 күнүттэн сүүрбэ байыастаах устудьуоннар тутар этэрээттэрэ тиийэн көмөлөһөр. Нэһилиэк улуус кииниттэн ырааҕын, суола суоҕун учуоттаан, тутуу матырыйаалын салгын суолунан («АЛРОСА» хампаанньа эбэтэр Ыксаллаах быһыы-майгы министиэристибэтин бөртөлүөтүнэн) илтэрэр туһунан кэпсэтии барар.
Орто Халыма куоратыгар Тырааныспар министиэристибэтин иһинэн 9,3 мөл. солк. көрүллэн, уулуссалары суолу үрдэтэн оҥоруу, Айылҕа харыстабылын министиэристибэтинэн 3,6 мөл. солк. көрүллэн, 780 м усталаах даамбаны үрдэтии үлэтэ ыытыллар. Оттон Сыбаатайга уонна Арҕахтаахха уу түһэрэ өссө да кэтэһиллэр…
Нэһилиэнньэ олоҕор куттал суох буолуутун хааччыйар судаарыстыбаннай кэмитиэт уонна Халаан содулун туоратыыга, чөлүгэр түһэрэр үлэни тэрийиигэ толоруулаах дириэксийэ 66 мөл. 67 тыһ. солк. суумалаах «Халаан содулун туоратыы дьаһалларыгар үбү көрөр туһунан» дьаһал бырайыагын бэлэмнээннэр Бырабыыталыстыбаҕа бигэргэтиигэ киллэрбиттэр. Ону таһынан от ыйын 17 күнүгэр бу икки биэдэмистибэ эппиэттээх үлэһиттэриттэн састааптаах оробуочай бөлөх чөлүгэр түһэрэр үлэ хаамыытын миэстэҕэ билсэ, сүрүннүү, көмөлөһө барыахтаах.
Бу туһунан Ил Түмэҥҥэ вице-спикер Виктор Губарев салалтатынан ыытыллыбыт Орто Халыма улууһугар халаан содулун туоратыыга, нэһилиэнньэҕэ көмөнү оҥорууга анаммыт мунньахха этилиннэ.
Раиса СИБИРЯКОВА, “Саха сирэ” хаһыат, edersaas.ru