Дьокуускай куорат полициятын 1 №-дээх отделын оперативниктара икки халааһыны «сылааһына» арыйдылар. Бу туһунан СӨ ИДьМ-тын пресс-сулууспата иһитиннэрдэ.
Бастакы быһылаан Чернышевскай уулуссатыгар сарсыарда 06.00 чаас саҕана буолбут. Биир киһи «Колибри» баарга сынньанан баран, сарсыарда 05.00 чаас саҕана Ф.Попов уулуссатыттан массыына тохтоппут.
Дьиэтигэр тиэрдибитин кэнниттэн, төлөбүрүн суоппарга онлайн төлөөн баран, массыынаттан тахсыбыт. Ол тахсаатын, төбөҕө охсубуттар…. көрбүтэ — кинини аҕалбыт суоппар төлөпүөнүн былдьаан баран, айанната турбут. Итирик сылдьар буолан, массыына мааркатын да, суоппары да үчүгэйдик өйдөөн көрбөтөх.
Ол да буоллар, бу халааһыҥҥа уорбаланааччыны оперативниктар түргэнник туппуттар — 23 саастаах кэлии омук киһитэ эбит.
Иккис быһылаан Лермонтов уулуссатын 90/3 нүөмэрдээх дьиэтин таһыгар киэһэ буолбут — биир киһи 45 саастаах дьахтары охсон баран, суумкатын былдьаабыт уонна өссө дьиэ анныгар соһо сатаабыт. Суумкаҕа харчыта уонна суотабай төлөпүөнэ бааллар эбит.
Дьахтар мүччү туттаран куотан, тута полицияҕа тыллаабыт.
Уорбаланааччы тутуллубут — урут уорууга түбэһэн сууттана сылдьыбыт, Дьокуускайтан төрүттээх 37 саастаах киһи эбит.
Бу чахчыларынан «Халааһын» ыстатыйанан холуобунай дьыалалар тэрилиннилэр. Бу ыстатыйанан көрүллэр накаастабыл миэрэ — 7 сылга диэри болдьоххо көҥүлү быһыы.
Биһиги корр., «Саха сирэ» хаһыат, edersaas.ru
Хаартыска: интэриниэттэн.