Халаан: Бааһынайдар эмсэҕэлээбиттэргэ көмөлөһөллөр

Ааптар: 
Бөлөххө киир:

Амма эбэ халааннаан, Амма улууһугар улахан хоромньуну таһаарда. Ол иһигэр, бааһына күрүөлэрэ, сайылыктар, ыаллар кыстык хотонноро, уон ынах сүөһү, сүүрбэттэн тахса сылгы ууга былдьанна.


Уу түһэн, чөлүгэр түһэрэр үлэ саҕаланна. Тыа хаһаайыстыбатын салаатын үлэһиттэрэ бу хамсааһынтан туора турбаттар. «Амма» ТХПК (салайааччы Айысен Черноградскай) Амма Наахара, Амма, Чапчылҕан, Абаҕа уонна Сатаҕай нэһилиэктэригэр хаһаайыстыбалара ууттан эмсэҕэлээбит үүтү туттарааччыларга 494 тыһ. солк. суумалаах өҥөнү оҥорорго быһаарда. «Фомин А.К.» бааһынай хаһаайыстыба 1,5 т хортуоппуйу биэрдэ. Оттон сүөһүлэрин былдьаппыт ыалларга «Илгэ» ХЭТ (бэр. В.Тимофеев), Дьоруой Лукин аатынан хаһаайыстыба (бэр. В.Онуфриев) уонна «Чараҥнаах», «Сэппэрээк», «Галина», «Чолбон», «Сэргэ Бэс», «Араз» бааһынай хаһаайыстыбалар биирдии сүөһүнү биэрэргэ быһаарынныллар. Маны таһынан ыаллыы Мэҥэ Хаҥалас улууһуттан «Тумул» кэпэрэтиип (сал. Таисия Десяткина) икки ынаҕы «Болугур» хаһаайыстыбаҕа биэрин биллэрдэ.

Александра Цыпандина, бааһынай хаһаайыстыбалар улуустааҕы ассоциацияларын бэрэссэдээтэлэ, РФ үтүөлээх зоотехнига:

Күндү дьоммут, ыарахан кэмҥэ күүс-көмө оҥорбуккутугар, киһилии аһыныгас сыһыаҥҥытыгар улаханнык махтанабыт. Баҕарабыт үлэҕитигэр үрдүк ситиһиини уонна чэгиэн-чэбдик доруобуйаны, дьоллоох олоҕу!

Амматтан Наталья Бубякина, Саха сирэ» хаһыат,  edersaas.ru сайтка анаан

+1
0
+1
0
+1
0
+1
0
+1
0
+1
0
+1
0