Халааҥҥа бэлэмнэнии туһунан Виктория Абрамченко уонна Юрий Борисов селекторынан мунньах ыыттылар
Билигин ханна даҕаны халаан уутун содула суох аһарыыга бэлэмнэнэллэр. Ону РФ Бырабыыталыстыбата хайдах тэрийэрин манна ааҕыҥ.
Хаар уонна халаан уутун саахала суох аһарыы боппуруоһа Бырабыыталыстыба Бэрэссэдээтэлин Михаил Мишустин хонтуруолугар турар.
Арассыыйа ЫБММ иһитиннэрэринэн, дойдуга халаанныыр кутталлаах сирдэргэ 5 тыһыынча нэһилиэнньэлээх пуун, 2,5 тыһыынчаттан тахса массыына суола, 49 тимир суолун учаастактара, 1250 муоста киирэллэр.
“Урукку сыллардааҕар быйыл хаардаах, тымныы, уһун кыһын ааста. Бүгүн биһиги туһааннаах сирдэр-уоттар халааны аһарыыга бэлэмнэрин дьүүллэһэбит, содулун аччатыыга эбии миэрэлэри ылынабыт”, — диэтэ Виктория Абрамченко.
Бырабыыталыстыба бэрэссэдээтэлин солбуйааччы хаар уонна халаан уутуттан бэлэмнэнии боппуруоһа РФ Куттал суох буолуутун сэбиэтигэр көрүллүбүтүн санатта.
Мунньах чэрчитинэн ЫБММ баһылыгын солбуйааччы Павел Барышев, Росгидромет салайааччыта Игорь Шумаков, Росводресурс салайааччыта Дмитрий Кириллов иһитиннэрдилэр.
Маны сэргэ Саха Өрөспүүбүлүкэтин, Пермскэй уонна Хабаровскай кыраайдар, Вологда уонна Иркутскай уобаластарын бэрэстэбиитэллэрэ отчуоттаатылар.
Росгидромет сабаҕалааһынынан нэһилиэнньэлээх пууннар уонна инфраструктура эбийиэктэрэ ууга барыылара Иркутскай, Сахалин уобаластарыгар, Хакасияҕа, Саха сиригэр уо.д.а атын уобаластарга, кыраайдарга күүтүллэр.
2021 сыллааҕы сааскы халаан уутун көрсө 237 быстах гидрологическай пуостар аһыллыахтара, интэриэстээх биэдэмистибэлэргэ уу туругун туһунан иһитиннэриэхтэрэ.
Росводресурс чахчыларынан, халаан уутугар барар кутталлаах сирдэргэ-уоттарга халааны утары кэлимсэ тэрээһиннэр торумнаммыттар. Ол курдук, Саха Өрөспүүбүлүкэтигэр, Ямало-Ненецкэй автономнай уокурукка, Пермскэй кыраайга, Вологодскай уонна Архангельскай уобаластарга. Тустаах тэрилтэ хапытаалынай өрөмүөнү эмиэ ыыппыт.
Дьон мууска маассабайдык тахсыытын хонтуруоллааһыҥҥа ЫБММ уонна ИДьМ сотрудниктара дьуһуурустабалары тэрийэллэр.
Селектор түмүгүнэн Виктория Абрамченко уонна Юрий Борисов халаан уутун сэрэтэр тэрээһиннэри силигин ситэрэргэ, нэһилиэнньэлээх пууннарга ас-үөл саппааһын тэрийэргэ, мэдиссиинэ уонна олоҕу-дьаһаҕы хааччыйар бастакы уочараттаах тэриллэринэн хааччыйарга сорудахтаатылар. Сүрүн болҕомто инженернэй инфраструктураҕа уонна экологияҕа кутталы таһаарбат туһугар эбийиэктэргэ ууруллуохтаах.
Юрий Борисов “Роскосмоска” ЫБММ-гэр сууккаҕа иккиттэн итэҕэһэ суох сиһилии түһэриллибит оптическай түһэриилэринэн уонна чахчыларынан хааччыйалларыгар сорудахтаата.
РФ Бырабыыталыстыбатын саайтыттан
Бэлэмнээтэ Женни Стрюкова
Хаартыска: https://www.kommersant.ru