Уопсастыба Успуорт

Хайыһар суолугар — бэтэрээннэр

Күөх Хонууга бүтэһик хаары баттаһа, бэтэрээн хайыһардьыттар өрөспүүбүлүкэҕэ бастыыр иһин биирдиилээн уонна хамаанданан күрэхтэһиилэрэ түмүктэннэ. Биллэрин курдук, аҕам саастаах хайыһардьыттарбыт кэлин сылларга Екатерина Никитина курдук дьаһаллаах, эрчимнээх салайааччылаах буоланнар, Уһук Илин регион, Россия, аан дойду кубогын курдук улахан күрэхтэһиилэргэ ситиһиилээхтик кытталлар. Ол курдук, соторутааҕыта Чурапчы чулуута Николай Захаров эстафетаҕа Россия сүүмэрдэммит хамаандатын састаабыгар киирсэн, аан дойду кубогын кыайыылааҕын үрдүк аатын ылан кэллэ.


Быйылгы, өрөспүүбүлүкэ аҕам саастаах хайыһардьыттарын күрэхтэһиитигэр 14  улуустан 78 хайыһардьыт үс күн устата илин-кэлин түһүстэ. Ол иһигэр Мэҥэ Хаҥалас, Хаҥалас, Чурапчы, Дьокуускай толору састааптаах хамаанданан кытыннылар. Бастакы күн “Гандикап” диэн быйыл саҥа киллэриллибит көрүҥҥэ, ол эбэтэр, аҕа саастаахтар урут түһэр, эдэрдэр эккирэтэр, эбиитин төһөнөн эдэрдэр да, оччонон бириэмэлэрэ эбиллэр сырсыыларыгар, муҥутуур кыайыылаахтарынан буоллулар: эр дьоҥҥо Степан Абрамов, дьахталларга Василиса Слепцова (иккиэн дьокуускайдар). Алта бастыҥҥа киирдилэр: Захаров Николай (Чурапчы), Слепцов Иван (Дьокуускай), Илларионов Афанасий (Мэҥэ Хаҥалас), Оконешников Николай (Чурапчы), Павлов Данил (Чурапчы), дьахталларга Павлова Екатерина, Петрова Антонина, Андреева Зинаида (үһүөн чурапчылар), Саввина Валентина, Никитина Екатерина (иккиэн дьокуускайдар).

Иккис күн эстафеталарга дьахталларга В.Слепцова, Л.Аргунова, М.Бандерова уонна Е. Кондратьева састааптаах Дьокуускай хамаандата ырааҕынан хааллартаан, эрэллээхтик бастаата, иккис Чурапчы, үһүс Мэҥэ Хаҥалас хамаандалара буоллулар. Эр дьоҥҥо Дьокуускай хамаандатын 12 сөк. куоппут А.Илларионов, В.Сидоров, Н.Яковлев, В.Кононов, Я.Попов састааптаах мэҥэлэр бастаатылар, иккис Дьокуускай, үһүс Хаҥалас хайыһардьыттара буоллулар.

Үһүс күн саастарынан көрөн 3, 5, 10 км биирдиилээн бастыыр иһин күрэхтэһиилэр буоллулар. Үс күннээх күрэхтэһии түмүгүнэн хамаанданан бастакы миэстэни үһүс сылын субуруччу киин куорат хайыһардьыттара ыланнар, “Чысхаан” спорткулууп кубогын бэйэлэригэр букатыннаахтык хааллардылар. Күрэхтэһии кыайыылаахтара уонна призердара “Чысхаан” кулууп мэтээлинэн, дипломунан, кубогынан, муҥутуур кыайыылаахтар анал бирииһинэн наҕараадаланнылар. Хамааданан иккис миэстэҕэ мэҥэлэр, үһүскэ чурапчылар таҕыстылар.

Кэлэр сылга аҕам саастаах хайыһардьыттары Уһук Илин, Россия, Аан дойду кубогын уонна “Чысхаан” кулууп өрөспүүбүлүкэтээҕи күрэхтэһиилэрэ күүтэллэр.

Иннокентий ПТИЦЫН, Дьокуускай.

Хаартыскаҕа: бэтэрээннэргэ аан дойду кубогын быйылгы кыайыылааҕа Николай Захаров.

 

0
0
Telegram Whatsapp

Добавить комментарий