Уопсастыба

Хайахсыттар Афанасий Илларионов сылын биллэрдилэр

Олунньу 25 күнүгэр Чурапчы улууһун Хайахсыт нэһилиэгэр биллэр-көстөр Судаарыстыбаннай деятель, СӨ норуодунай дьокутаата, Судаарыстыбыннай мунньах (Ил Түмэн) бэрэстэбиитэллэрин палататын бастакы бэрэссэдээтэлэ, үтүөлээх юрист, бэйиэт, тылбаасчыт Афанасий Петрович Илларионов сылын арыллыыта буолла. Тэрээһин Афанасий Илларионов төрөөбүтэ 75 сылыгар ананна.

Хайахсыт нэһилиэгин эдэр ийэлэрэ кыргыттарын кытта эҕэрдэ үҥкүүлэрэ

Людмила Попова, “Саха сирэ” хаһыат, https://edersaas.ru/
Нэһилиэк историятын көрдөрөр оскуола түмэлин иилээн-саҕалаан үлэлэтэр педагогическай үлэ бэтэрээнэ Мария Николаевна Петрова нэһилиэк дьонун-сэргэтин уонна А.П.Илларионов туһунан киэҥ ис хоһоонноох кэпсээнэ, экспонаттара мустубут дьон болҕомтотун тарта. Тэрээһиҥҥэ олохтоох дьаһалта баһылыга В.В.Прудецкай, Хайахсыт оскуолатын дириэктэрэ Ф.И.Борисов, Хоптоҕо нэһилиэгин баһылыга Д.Д.Дьячковскай, улуустааҕы үөрэх управлениетын исписэлииһэ Д.А.Илларионов, балта Г.П.Филиппова кыыһыныын Татьяналыын о.д.а. кытыннылар. Кэлбит ыалдьыттары сахалыы сиэринэн арыылаах алаадьынан, саламаатынан, итии үүттээх чэйинэн айах туттулар.
Афанасий Петрович туһунан кэргэнэ Венера Егоровна Илларионова, бииргэ төрөөбүт быраата Петр Петрович Илларионов, урукку кэмҥэ управляющайынан, онтон баһылыгынан үлэлээбит Василий Егорович Федоров, Россия Суруйааччыларын сойууһун чилиэнэ, үтүөлээх учуутал Аркадий Максимович Дорофеев истиҥ-иһирэх ахтыыны оҥордулар. Венера Егоровна нэһилиэк библиотекатыгар А.П.Илларионов тылбаастарын кинигэтин итиэннэ кини тылларыгар айыллыбыт “Чараҥ вальса” ырыанньыгы бэлэхтээтэ.
Киэһэ Хайахсыт нэһилиэгин “Алаһа” норуот айымньытын дьиэтигэр Афанасий Илларионов сылын үөрүүлээх быһыыга-майгыга арыйар кэнсиэр тэрилиннэ. Итини тэҥэ, өрөспүүбүлүкэҕэ — Ыччат, Россияҕа — Экология, Чурапчыга — История, Хайахсыкка — Дьон көҕүлээһинин сылларын арыллыытын бу бэлиэ даатаҕа сөп түбэһиннэрэн доҕуһуоллаатылар.

Оскуола үөрэнээччилэрэ А.П.Илларионов хоһооннорун ааҕаллар

Тэрээһини эдэр ийэлэр түмсүүлэрэ кыталык кыргыттарын кытта нарын-намчы үҥкүүлэринэн, оскуола уолаттара Афанасий Илларионов хомоҕой хоһооннорунан, алын сүһүөх кылаас оҕолоро ылбаҕай ырыанан, о.д.а. киэргэттилэр. Кэнсиэри И.Г.Тимофеев-Теплоухов аатынан “Алаһа” норуот айымньытын дьиэтин уус-уран салайааччыта Игнат Каженкин уонна Култуура колледжын устудьуона Мария Кузьмина салайан ыыттылар. “Россия ийэлэрэ”  уопсастыбаннай түмсүү сүрэхтэниитэ буолла.
Манна даҕатан эттэххэ, бэс ыйын 15 күнүгэр А.П.Илларионов төрөөбүтэ 75 сылыгар аналлаах “Уунабын сибэкки дьөрбөтүн” диэн улуус ыһыаҕын ыһарга бэлэмнэнэллэр. Ыһыах мээнэҕэ итинник ааттамматах. Үтүөлээх юрист, бэйиэт Афанасий Илларионов тылыгар, композитор Захар Степанов муусукатыгар айыллыбыт киэҥник биллэр ырыа буолар. Ыһыах Александр Титигиров туруоруутунан барыаҕа. “Күлүмэх күүстээх Күөнчэ Бөҕө” өрөспүүбүлүкэтээҕи күүстээхтэр күрэхтэһиилэрэ ыытыллыаҕа. Бу бэлиэ күҥҥэ анаан, Хайахсыт эр дьоно, кими да кэтээбэккэ-манаабакка, ыһыах түһүлгэтин (биэс ураһаны, үс балаҕаны, быыстапкалыыр павильону о.д.а. тутуулары) барытын саҥаттан бэйэлэрин күүстэринэн оҥороору ох курдук оҥосто сылдьаллар. Оттон кэрэ аҥаардар түмсүүлэрэ нэһилиэги көҕөрдүүгэ күүскэ ылсар санаалаах, тэрилтэлэринэн уонна түөлбэлэринэн сибэкки үүннэриитин саҕалаатылар.
А.П.Илларионов төрөөбүтэ 75 сылыгар анаан араас тэрээһини былаанныыллар. Ол курдук, “Сааскы кылыһахтар” улуустааҕы ырыа бэстибээлин, “Лидер уонна кини хамаандата” регионнааҕы дьыалабыай оонньууну ыытарга, нэһилиэк киинигэр кини аатынан сквер тутары, уо.д.а. тэрээһиннэри тэрийиэхтэрэ.

Людмила Попова, “Саха сирэ” хаһыат, https://edersaas.ru/

1
0

Добавить комментарий