Өрөспүүбүлүкэҕэ уонна улууска биллэриллибит Доруобуйа сылын чэрчитинэн, Чурапчы А.П. Илларионов аатынан Хайахсыт орто оскуолатын иһинэн үлэлиир «Хенд-мейд» бырайыак оҕолоро кэлэн иһэр Аан дойду дьахталларын күнүнэн «Кыһыл зонаҕа» үлэлиир 55 кэрэ аҥаар медперсоналга бэйэлэрин бэлэхтэрин, илиинэн оҥоһуктарын туттардылар.
«Биһиги оскуолабытыгар талааннаах, илиилэригэр дьоҕурдаах оҕолор элбэхтэр. Онон, кинилэр бу дьоҕурдара өссө сайдарыгар олук ууран уонна саҥа саҕалааччыларга көмөнү тэрийэн, быйыл күһүҥҥүттэн технология, изо учууталлара Ксения Иннокентьевна Петрова, Любовь Ивановна Филиппова, уолаттары уһанарга үөрэтэр Михаил Михайлович Поисеев уонна айылҕаттан ууска, иискэ дьоҕурдаах математика учуутала Диана Дмитриевна Винокурова буолан сүбэлэһэн, бу бырайыакпыт үлэтэ саҕаламмыта», — диэн «Хендмейд» бырайыак салайааччыта, оскуола педагог-организатора Надежда Семеновна Борисова кэпсиир.
Кини этэринэн, оҕолор бырайыак үлэтин олус сэҥээрдилэр, бииртэн биир саҥа көрбүттэрин, сэҥээрбиттэрин айан-тутан иһэллэр. Ол курдук, бастакы оҥоһуктарынан нэһилиэнньэҕэ лоторея оонньотон, кыра үп-харчы киллэриммиттэр. Буолаары турар Дьахтар күнүгэр улахан үлэни ылсаммыт кыратык бириэмэбит тахсыбата, онон, дьахтар күнүн кэннэ эмиэ салгыыр былааннаахтар. Бырайыагы оскуола кэлэктиибэ олус сэҥээрбит, туох кыалларынан көмөлөһөр, онон инникилээх буолуоҕа диэн бырайыактаахтар эрэллэрэ улахан.
edersaas.ru