Аан дойдуга Тымныы полюһунан аатырар Өймөкөөн улууһун Өймөкөөн нэһилиэгин «Тымныы оройо» Култуура дьиэтэ сыстыганнаах дьаҥ кэмигэр «Хайа, туох сонун?» биэриини онлайн нөҥүө бэлэмнээн таһаарар буолла.
edersaas.ru
Сонун сүүрээн улуус 100 сыллаах үбүлүөйүгэр ананар. Онон куйаар нөҥүө биэриигэ Өймөкөөн нэһилиэгин талааннаах дьоно-сэргэтэ, уопсастыбанньыктара, актыбыыстара бэйэлэрин айар үлэлэрин билиһиннэрэллэр, олохторун сырдаталлар, көрөөччүлэр хоруйдарыгар эппиэттииллэр.
Биэрии бастакы ыалдьытынан Чысхаан уобараһын аан дойдуга тиийэ билиһиннэрбит, ырыаһыт, муусукаан, худуоһунньук, мас ууһа, хаартыскаҕа түһэрээччи Семен Сивцев-Өймөкөөн Сэмэнэ буолла. Соторутааҕыта кини Өймөкөөн улууһун булчуттарыгар уонна сэрии кэмигэр тыа сирин дьонун булт быһыытынан абыраабыт куобахха анаабыт пааматынньыгын оҥорон биллибитэ.
Иккис биэриигэ Чурапчы улууһун Мугудайыттан төрүттээх Өймөкөөн нэһилиэгин дьоно-сэргэтэ кинини киһи быһыытынан үтүө киһи буоларын бэлиэтээн, «Көмүс күтүөт» диэн ааттыыр киһилэрэ, мелодист, хоһоонньут Петр Дьячковскай кыттыыны ылла.
Бу туһунан «Тымныы оройо» Култуура дьиэтин салайааччыта Ульяна Захарова иһитиннэрдэ.
Cубуота киэһэ аайы тыа сирин кулууба куйаар нөҥүө ыытар тэрээһинин нэһилиэк олохтоохторо «инстаграмнарын» холбоон, анаан күүтэр буоллулар.
Ийэ дойдуга бэриниилээх буолуу сылыгар Өймөкөөн нэһилиэгин дьоно бу биэриигэ үөрэ-көтө кытталлар, төрөөбүт түөлбэлэригэр, иккис дойду оҥостубут тапталлаах Өймөкөөннөрүн сайдыытыгар бэйэлэрин кылааттарын киллэрэллэрин билиһиннэрэллэр.
Елена ПОТОЦКАЯ, «Саха сирэ» хаһыат, edersaas,.ru
Хаартыска — «Тымныы оройо» КДь инстаграмыттан.