Көҥүл тустууга олимпийскай чөмпүйүөн, аан дойду биэс төгүллээх, Европаҕа үс төгүллээх кыһыл көмүс мэтээлин хаһаайына, аан дойду Кубогын үс төгүллээх хаһаайына, Арассыыйа чөмпүйэнээтин аҕыс төгүллээх чөмпүйүөнэ, “Доҕордоһуу” уордьан кавалера, СӨ үрдүкү консультант-тириэньэрэ, көҥүл тустуу үтүөлээх маастара Хаджимурат Солтанович Гацалов Чурапчы улууһугар ыалдьыттыы сылдьар. Бу туһунан Чурапчы улууһун баһылыга Андрей Ноговицын иһитиннэрдэ.
— Бэҕэһээ институкка ыалдьыттаан, спортивнай улуус буолар историябытын билистэ. “Арчы” дьиэтигэр арчылааһыҥҥа, ол кэнниттэн ССРС, РСФСР, Саха АССР үтүөлээх тириэньэрэ Дмитрий Коркин аатынан спортивнай Албан аат музейыгар, Дмитрий Коркин аатынан Чурапчытааҕы республиканскай олимпийскай эрэллэри бэлэмниир интэринээт-оскуолаҕа Роман Дмитриев, Павел Пинигин, Александр Иванов Олимпиадаҕа өрөгөйдөрүн 45 сылыгар анаммыт хаартысканан быыстапкаҕа сырытта. Күн иккис аҥарыгар, МФСК кэлэн көҥүл тустуу иитиллээччилэрин көрсөн кэпсэттэ, алгыс тылын анаата. Маны тэҥэ, Чурапчы ытык сиригэр кэлбитин бэлиэтиир үөрүүлээх сиэрэ-туома оҥоһулунна. Аатырбыт тустуук бүгүн-сарсын ыытыллар Чурапчы улууһун федерациятын бирииһин иһин көҥүл тустууга өрөспүүбүлүкэ турнирын кэтээн көрүөҕэ, — диэн Андрей Ноговицын инстаграмҥа тус страницатыгар суруйда.
edersaas.ru
Хаартыска https://www.instagram.com/p/CMngwrVMEJ0/