Хадан көхтөөх ыччата Илья

Бөлөххө киир:

Хадан нэһилиэгин ыччатын лиидэрэ, 24 саастаах Илья Иванов ыытар үлэтин социальнай ситимнэринэн өрүү сэргии, кэрэхсии көрөбүн.

Ый анараа өттүгэр, Хадантан чугас Арҕаа Дьэли үрэҕи балыксыттар бөҕүнэн-саҕынан толорбуттарын ыччат лиидэрэ көрөн, улаханнык айманан, биир дойдулаахтарын түмэ тардан, барытын ыраастаан, хому­йан кэбиспиттэрэ. Бу үрэххэ улуус олохтоохторо эрэ буолбакка, ыаллыы сытар улуустартан эмиэ кэлэн балыктаан бараллар.

Бу күннэргэ Ильяны кытары төлөпүөнүнэн сибээстэһэн, Үтүө дьыаланы оҥорооччу сылыгар хайдах хабааннаахтык үлэлии сылдьалларын ыйыталастым.

Үтүө дьыаланы оҥорооччу сылынан сибээстээн, биһиги нэһилиэкпитигэр «Палка добра» диэн тэрилтэлэринэн эстэпиэтэ ыытыллар. Бу тэрээһини Хадан баһылыга Андрей Оконешников көҕүлээбитэ. Эстэпиэтэҕэ бастакынан олох­тоох ыччаттар кыттыбыппыт. Ол кэнниттэн олохтоох дьаһалта, Хадан орто оскуолата кыттыспыттара. Хас биирдии үтүө дьыаланы видеоҕа устан, инстаграм ситимигэр та­­һаарабыт. Сорох дьон видео устарбытын сэҥээрбэт. Ол гынан баран, биһиги таһаарар видеоларбытын дьон-сэргэ көрөн, үтүө дьыаланы оҥорууга кыттыстыннар диэн са­­наалаахпын. Ыччаттар үтүө дьыаланы оҥорууга, киһиргээбэккэ эттэхпинэ, икки ­илиилэрин уунан бараллар. Биһиги эдэр ыччат оскуолаҕа үөрэнэр ба­­лыстарбытыгар, бырааттарбытыгар уонна дьоҥҥо-сэргэҕэ холобур буолар тустаахпыт. Эдэр ыччат куруук бастакы сылдьыахтаах диэн санаалаахпын. Түгэнинэн туһанан, нэһилиэкпит баһылыгар Андрей Николаевичка биһигини куруутун өйдүүрүн, өйүүрүн иһин махталбын тириэрдэбин, – диэн Хадан ыччата Илья санаатын үллэһиннэ.

Ол курдук, «Палка добра» аахсыйаҕа тэрилтэ үлэһиттэрэ кыттыһан, кырдьаҕастарга мастарын хайытан, туруоран, хаардарын ­­ыраастаан биэрэллэр эбит.

Тыа сирин үлэтэ бүппэт. Мантан саас аны ырааһырдыы, көҕөрдүү үлэлэрэ ыытыллыахтара. Ордук ытык кырдьаҕас дьоммут, соҕотох олорор ийэлэр өрүү көмөҕө наадыйаллар. Онон үтүө санаалаах ыччаттар күүс-көмө, өйөбүл буолаллара киһини үөрдэр.

edersaas.ru

+1
0
+1
0
+1
0
+1
0
+1
0
+1
0
+1
0