Хабырыыл Хабытчаарап бэйэтин күрэхтэһиитигэр Трофимовалаах Леонтьеваны кытыннарыан баҕарда
Үөһээ Бүлүү кырдьаҕас олохтооҕо Хабырыыл Киргиэлийэбис Хабытчаарап:
— Мин аҕыс уон иккибэр сылдьабын. Эдэрбиттэн спорт көрүҥнэриттэн чуолаан хаамыыны уонна сүүрүүнү ордоробун. Бүгүн икки чулуу быһый кыыспыт — Сардаана Трофимова, Наталья Леонтьева кырасыабай сүүрүүлэринэн дьоннорун-сэргэлэрин үөртүлэр уонна долгуттулар. Эчи, сиргэ дугуналлара да көстүбэт, салгыҥҥа уйдаран иһэр курдуктар. Түс бэйэм онтон олуһун диэн астынным. Ыччат барыта итинник чэпчэкитик туттара-хаптара буоллар бэрт буолуо этэ.
Бэйэм дойдубар, Тамалакааммар, 65 сааспын туоларбар оскуола оҕолоругар сүүрүү бырааһынньыгын тэрийбитим. Онтон ыла биэстии сыл арыттаан түөрт төгүл ыыттым. Аны үс сылынан бэһис күрэхтэһиибин тэрийэр санааланным. Онно балтыбытын Сардаананы уонна кини дьүөгэтин Наталья Леонтьеваны ыҥыран кытыннарыахпын баҕардым.
Ыччат дьоҥҥо туһаайан этиэ этим: дьоллоох-соргулаах олоҕу олороннор саха норуотун аан дойдуга ааттата турдуннар.
Роман Попов, «Саха сирэ» хаһыат