Хабибтаах Конор киирсиилэригэр сахалар элбэх харчыны уктулар (ВИДЕО)
Кэтэһиилээх, айдааннаах Хабиб Нурмагомедов уонна Конор Макгрегор UFC 229 турнирга киирсиилэрэ бу өрөбүлгэ 11 чаастан «Матч-боец» ханаалга көстүөҕэ.
Бу киирсии тула элбэх харчы оонньонорун булкаастаах киирсиини сэҥээрээччилэр бэркэ билэллэр. Киирсиитин аайы баһаам харчыны оҥорор Конор Макгрегоры кытта хас биирдии охсуһуук киирсиэн баҕарар. Оттон Хабиб уонна Конор бэйэлэрин истэригэр айдаарсыылаах буоланнар, кинилэр киирсиилэрин UFC салалтата үрдүк сыанаҕа төлөбүрдээх ханаалларга атыылыыр. Эбиитин, охсуһууну илэ харахтарынан көрүөн баҕалаахтар киирии билиэтин аҕыйах мүнүүтэнэн атыылаһан бүтэрбиттэр. Билигин спорка уксуу урбаана сайдан, дьон-сэргэ араас спорт көрүҥэр харчы угаллар. Сорохтор сүүйэллэр, сорохтор сүүйтэрэллэр. Ол курдук, сахалар да хаалсыбаттар, харса суох уксан иһэллэр.
Бэҕэһээ батсаап ситимигэр 1 мөл. 300 тыһ. солкуобайы Хабиб Нурмагомедов кыайыытыгар укпуттарын туоһулуур чек тарҕаммыта. Бу угууну ким оҥорбута биллибэт. Өскөтүн, Хабиб кыайар түгэнигэр, бу киһи 2 мөл. 145 тыһ. солкуобайы сүүйэр. Ол эрэн, Хабиб кыайтардаҕына, укпут харчытын кытта быраһаайдаһар. Маннык угууну киһи хайдах быһыы-майгы диирин билбэт. Сорох дьон халбархай суолга үктэниэхтэрин да курдук.
Ыччакка биллэр ырыаһыт Дьулустаан Чуручанов инстаграмыгар Конор Макгрегорга 20 000 солкуобайы укпутун таһаарбыт. Бэйэтэ суруйбутунан, кини Конорга ыалдьар уонна эрэнэр эбит: «Конор кыайдын да кыайтардын, син биир киниэхэ ыалдьабын»,-диэн суруйбут Дьулустаан. Конор кыайыы өрөгөйүн биллэҕинэ, Дьулустаан 51 400 солкуобайданар.
Санатан этэххэ, алтынньы 7 күнүгэр Хабиб Нурмагомедов уонна Конор Макгрегор UFC чэпчэки ыйааһыныгар 66-70 кг диэри чөмпүйүөн үрдүк аатын былдьаһыахтара. Киирии билиэттэрин сыаната 40 000-1 500 000 солкуобайга тиийэр. edersaas.ru
Николай Попов, «Саха сирэ» хаһыат, edersaas.ru