Хабаровскайтан Дьокуускайга пандемия кэмигэр олус наадалаах эми-тому тиэммит фургон массыыналар сэтинньи 13 күнүгэр айаҥҥа туруннулар. Бу эми “Сахафармация” ААУо, “Фармбаза” ХЭТ курдук кууһунан атыылыыр бөдөҥ тэрилтэлэр сакаастаатылар диэн Уһук Илиҥҥэ Саха сирин Бастайааннай бэрэстэбиитэлистибэтэ иһитиннэрэр.
Массыыналар 3 тыһыынча килэмиэтири “Амур”, “Лена” федеральнай суолларынан айаннаан кэлэннэр, аҕыйах күнүнэн эмп-томп аптекаларга киириэҕэ. Эми Хабаровскайга баар, 80 сыл уопуттаах “Дальхимфарм” диэн фармацевтическай собуот оҥорон ыытта. Собуот коронавируһу эмтииргэ туһаныллар антимикробнай уонна антивируснай эмтэри оҥорон саҕалаабыт. Онон чугастыы тиэллэн кэлэрэ сыаната чэпчииригэр оруоллаах буолуо.
“Дальхимфарм” химическэй-фармацевтическэй собуот эмп-томп 200-тэн тахса көрүҥүн оҥорон таһаарар. Эмтэри анестезияҕа, дезинтоксикацияҕа, гинекологияҕа, дерматологияҕа, урологияҕа туһаналлар.
Ону тэҥэ, илиҥҥи мэдиссиинэҕэ анаан амурскай уонна уссурийскай тайҕа үүнээйилэриттэн настойкалары, эликсирдэри, экстрактары оҥорон атыылыыр. Саха сириттэн кэлбит, таба муоһуттан ылыллар пантыны туһанан оҥорбут эликсирдэрин олохтоохтор эрэ буолбакка, омук дьоно эмиэ бэркэ биһирээбиттэрэ.
Ангелина Васильева, “Саха сирэ” хаһыат, edersaas.ru