Маны аах Уопсастыба

Хабаровскайга Тымныы полюһун Өймөкөөнү билиһиннэриэхтэрэ

Бу күннэргэ Өймөкөөн улууһун дэлэгээссийэтэ Хабаровскай куоракка Өймөкөөн улууһун билиһиннэрэр ыһыаҕы тэрийэн ыытыаҕа.

1992 сыллаахха Уһун Илин уокуругар Саха сирин сирэйдиир Бастайааннай бэрэстэбиитэлистибэ филиала Хабаровскай куоракка аһыллыбыта. Төһө да уустук, уларыйыы-тэлэрийии кэмигэр аһылыннар, бэрэстэбиитэлистибэ Саха сирэ Азия илиҥҥи дойдуларын кытта экэнэмиичэскэй, култуурунай уонна социальнай хайысхаларынан сайдыытыгар сүҥкэн кылаатын киллэрэр.

Бастакы сылларга Хабаровскайга үөрэнэр устудьуоннар күүстэринэн землячестволар ыһыахтара тэриллэр эбит буоллахтарына, кэлиҥҥи сылларга Уһук Илин биир бөдөҥ куоратыгар сыл аайы өрөспүүбүлүкэ улуустара бэйэлэрин олохторун-дьаһахтарын билиһиннэрэллэр, тустаах биэдэмистибэлэри кытта дьыалабыай сөбүлэҥнэри түһэрсэллэр, култуурунай тэрээһиннэри ыытар уонна саамай сүрүнэ, улуустарын сирэйдиир ыһыахтары тэрийэллэр. Ол курдук, Чурапчы, Нам, Уус Алдан улуустара бэйэлэрин устуоруйаларын, култуураларын билиһиннэрэн туран, анаан ыһыахтаан барбыттар.

Саха сирин  Уһук Илин уокуругун Бэрэстэбиитэлистибэтин иһитиннэрэр-биллэрэр киинин исписэлииһэ Станислав Михайлов бэлиэтээбитинэн, Хабаровскай кыраай олохтоохторо сахалар ыытар тэрээһиннэрин олус сэргээн, сыл аайы анаан кэтэһэн сылдьаллар, көрөллөр-истэллэр  эбит. Икки сыл бары тэрээһини тохтоппут сыстыганнаах дьаҥ эпидемиятын кэнниттэн быйыл үбүлүөйдээх ыһыаҕы Хабаровскайга Өймөкөөн улууһа тэрийэн ыытыаҕа.

Улуус баһылыга Иннокентий Сивцев иһитиннэрбитинэн, ыам ыйын 20 күнүгэр улуус салалтата  Хабаровскай кыраай  вице-губернатора, губернатор  дьаһалтатын уонна кыраай бырабыыталыстыбатын аппараатын салайааччыта   А.А. Никитины, кыраай Дууматын бэрэссэдээтэлэ  И.В. Зикунованы, кыраай Бырабыыталыстыбатын Бэрэссэдээтэлин солбуйааччы –  экэнэмиичэскэй сайдыы миниистирэ  В.Д. Калашниковы кытта көрсүһүөҕэ. Хабаровскай кыраай Охотскай оройуонун уонна Өймөкөөн улууһун салалталара бииргэ үлэлээһиҥҥэ илии баттаһыахтара. Маны таһынан, Саха сиринээҕи  уонна  Хабаровскай кыраай Норуоттар ассамблеяларын уопсастыбаннай тэрилтэлэрэ  2014 сыл ыам ыйын 24 күнүгэр түһэрсибит Сөбүлэҥнэрин саҥардыахтара.  Дьыалабыай көрсүһүүлэр кэннилэриттэн Өймөкөөн улууһун дэлэгээссийэтэ   51460 №-дээх «Млечник» байыаннай чааска сулууспалыыр Саха сириттэн сылдьар саллааттары кытта көрсүөҕэ. Ыам ыйын 21 күнүгэр  Арчы түһэ (Ыраастаныы сиэрэ-туома), Ыһыах Алгыһа түстэниэҕэ. Суолталаах тэрээһин Воронежскай сэлиэнньэҕэ баар “Эко Парк Воронеж” туристическай комплекска ыытыллыаҕа.  Бу күн Саха сирэ уонна Хабаровскай кыраай  айар кэлэктииптэрин улахан кэнсиэрдэрэ буолуоҕа. Ыам ыйын 22 күнүгэр — Ньукуолуҥҥа Өймөкөөн улууһун дэлэгээссийэтэ Еврейскэй Автономнай уокурук Биробиджан куоратыгар СӨ Судаарыстыбаннай  филармониятын кэнсиэрэ үөрүүлээх аһыллыытыгар кыттыаҕа. Буоларын курдук, үбүлүөйдээх ыһыахха саха  национальнай куукуната, ювелирнай уонна норуот оҥоһуктара,  мас тардыһыытыгар уонна хапсаҕайга, ыччаттарга «Үрүҥ Уолан» уонна «Кыыс Ньургун» күрэхтэр буолуохтара. Үбүлүөйдээх Ыһыах дьону түмэр алгыстаах оһуокайынан түмүктэниэҕэ.

Суолталаах тэрээһин Саха сирэ Арассыыйа састаабыгар киирбитэ — 390, Саха АССР уонна СӨ Бастайааннай бэрэстэбиитэлистибэтин  — 100,  Саха сирин Уһук Илиннээҕи Бэрэстэбиитэлистибэ 30 сылларыгар ананар.

Өймөкөөн улууһун дэлэгээссийэтин айар бөлөҕө   «Өймөкөөн Тымныы полюһа» диэн дьүһүйүүнү көрдөрүөҕэ. Чысхаан уобараһын  Филипп Захаров, Муус Хайаны  – Елена Слепцова,  Үрүҥ Табаны  Надежда Босикова, Дьүкээбили Аксинья Васильева арыйан көрдөрүөхтэрэ. Музыкальнай композицияҕа Томтор, Өймөкөөн уонна Төрүт кулууптарын көстүүмнэрин туһаныахтара.

Дьыалабыай боппуруостары быһаарар уонна Тымныы полюһа — Өймөкөөнү билиһиннэрэр соруктаах улууспут дэлэгээссийэтигэр ситиһиилээх үлэни баҕарабыт!

 

Елена ПОТОЦКАЯ, «Саха сирэ» хаһыат, edersaas.ru

Хаартыска — Станислав Михайлов тиксэриитэ.

1
0
Telegram @edersaas20