Быйыл Мэҥэ Хаҥалас Хаатылыматын олохтоохторо Улуу Кыайыы күнүн уратытык бэлиэтээтилэр.
Ол курдук, бастаан, үгэс быһыытынан, оскуола-саад аттыттан саҕаламмыт нэһилиэк параадыгар эдэр-эмэн барыта кытынна.
Улуу Кыайыыга аналлаах монумеҥҥа тиийэннэр, хаатылымалар Кыайыыны уһансыбыт дьоннорун кэриэстээн, венок уурдулар.
Ытыктабыллаах бэтэрээннэри, биир дойдулаахтарын Улуу кыайыы 73 сылынан баһылык Ким Попов, олохтоох оскуола-саад кэлэктиибэ, култууралар, уо.д.а. истиҥник эҕэрдэлээтилэр.
Бу күн, “Уруйдан, Улуу Кыайыы!» бырааһынньык кэмигэр бэтэрээннэргэ уонна ыалдьыттарга «Полевой куукуна» үлэлээтэ, сандалы остуол тардылынна.
Онтон күнүс култуура киинигэр «Кыайыы өрөгөйө» бэтэрээннэр көрсүһүүлэрэ тэрилиннэ.
Бэлиэ күн биир уратытынан олохтоохторго саха норуодунай суруйааччыта Суорун Омоллоон «Ырыкыныап ыыспата»испэктээҕин көрдөрүү буолла. Бу испэктээҕи дьон олус кэтэспитэ. Тоҕо диэтэххэ, манна оруоллары бүтүннүү бэйэлэрин биир дойдулаахтара – дэриэбинэлэрин дьоно бэрт итэҕэтиилээхтик оонньууллар. Ол, биллэн турар, хаһан баҕарар интэриэһинэй буолааччы.
Холобур, Ырыкыныап – боростуой ыал эһэтин оруолун Николай Аргунов, фельдшер кыыһы Ларисаны кулууп үлэһитэ Клара Слободчикова, киинэмэхээнньик Сэргэйи Андрей Местников, эмчит кыыс дьүөгэтин Өксүүнү кулууп дириэктэрэ Фаина Спиридонова, ыаллара Арыппыананы Александра Дмитриева, Киэсиги Вячеслав Афанасьев, Марусяны Любовь Павлова толордулар. Режиссердар Фаина Спиридонова уонна Данил Осипов.
Манна даҕатан эттэххэ, бу испэктээҕинэн култуура эстафетатыгар олохтоохтор лауреат аатын ылбыттара.
Киэһээ «Факеллаах хаамыы» кыттыылаахтара уоттаах сэрии толоонугар охтубут буойуттар сырдык ааттарыгар өйдөбүнньүк чүмэчилэрин уматтылар.
Дьон-сэргэ параадка кыттан, испэктээк көрөн, олус астынан, нэһилиэк баһылыгар Ким Кимович Поповка, кулууп дириэктэригэр Фаина Петровна Спиридоноваҕа улахан махталларын биллэрдилэр, маннык, бука бары биир киһи курдук, көхтөөхтүк сынньанарбыт, түмсүүлээхтик үлэлиирбит-хамсыырбыт олус үчүгэй, дэстилэр.
Аҕа көлүөнэлэрбит эйэлээх олоҕу аҕалбыт, көҥүлү түстээбит кэскиллээх дьыалалара өйгө-сүрэххэ мэлдьи тыыннаах. Ким да умнуллубат, туох да умнуллубат!
Татьяна МАРКОВА, edersaas.ru