Мэҥэ-Хаҥалас улууһун 2-с Тыыллыма нэһилиэгин Үрүҥ тунах ыһыаҕа бэс ыйын 21 күнүгэр эмиэ бэрт тэрээһиннээхтик, ситиһиилээхтик ыытылынна.
Уйгулаах ыһыах уруйдаах туонатыгар алгыс түстэ, ыһыах дьоно кыынньар кымыһынан күндүлэннэ.
Хаатылыма сэлиэнньэтин олохтоохторо уонна ыалдьыттара, үгэс быһыытынан, ыһыах туох баар тэрээһиннэригэр көхтөөхтүк кытыннылар.
Үгүс үтүө түгэни Майатааҕы Д.Ходулов аатынан Култуура дьиэтин кэлэктиибэ аҕалла. Ол курдук, Майалар буойун-суруйааччы Семен Никифоров төрөөбүтэ 95 сылын чэрчитинэн, театрализованнай дьүһүйүүнү көрдөрдүлэр.
Оттон СӨ үтүөлээх артыыската Сардаана Осипова иэйиилээх ырыаларын, олох “тутан олорон” дуоһуйа истэн, талааннаах ырыаһыттыын бииргэ ыһыахтаабыттарыттан олохтоохтор эмиэ олус астыннылар уонна кулууптарын дириэктэригэр Фаина Спиридоноваҕа үчүгэй тэрээһинин иһин махтаннылар.
Бэ бэлиэ күн 2-с Тыыллыма кырдьаҕастара нэһилиэк бочуоттаах аатын ылбыттара ураты үөрүүлэннэ. Оттон нэһилиэк баһылыга Ким Попов улуус Аҕа баһылыгын Махтал суругун туппута эмиэ биир умнуллубат түгэнинэн буолла.
Тэриллибитэ сыл буолбут “Үрүйэчээн” ансаамбыл чилиэннэрэ биир дойдулаахтарыгар, наҕараадаламмыттарга кэрэ үҥкүүлэрин-ырыаларын бэлэхтээтилэр. Бу күн ыраахха диэри оһуохай дуорайда.
Татьяна МАРКОВА, «Саха сирэ» хаһыат, edersaas.ru