Саҥа 2022 сылга үктэнээти кытта, тохсунньу 11 күнүгэр Мэҥэ Хаҥалас улууһун Хаатылыма сэлиэнньэтигэр үөрүүлээх Дьоро киэһэ буолла.
Ол курдук, “Үрдэл-2021” национальнай мусукаалынай бириэмийэ «Муҥутуур кыайыылааҕа» үрдүк ааты ылбыт, хаатылымалар күндү күтүөттэрэ Виктор Иванов — Сиэйэ Уола биир дойдулаахтарын Саҥа дьылынан эҕэрдэлээн туран, хаһан баҕарар куруутун өйүүллэрин иһин махталын бэлиэтигэр — айар бөлөҕүн кытта босхо кэнсиэр көрдөрдө. Кэнсиэргэ көрдөөх-нардаах Альберт Михайлов, Сунтаар ыччата Айаал Кириллин-Күндэл кыттыыны ыллылар.
II Тыыллыма нэһилиэгэ нэһилиэнньэтин ахсаана олус элбэҕэ да суох буоллар, манна олохтоохтор, эдэрдиин-эмэнниин, үгэс быһыытынан, олус көхтөөхтөр. Култуурунай, мусукаалынай, театральнай, онтон да атын үгүс дьон кыттыылаах тэрээһиннэри Фаина Петровна Спиридонова дириэктэрдээх олохтоох Култуура дьиэтин кэлэктиибэ иилиир-саҕалыыр. Оттон уус-уран салайааччынан манна Виктор Иванов-Сиэйэ Уола үлэлиир. Нэһилиэнньэҕэ, ыччаттарга анаан Култуура дьиэтин иһинэн айар устуудьуйа, куруһуоктар бааллар. Кулууп – дьон-сэргэ таптаан сылдьар сирэ, түмсэр киинэ.
Кэнсиэри, биллэн турар, билиҥҥи кэм ирдэбиллэринэн, бары сэрэтэр миэрэлэри тутуһан, тэрийдилэр. Бэйэ-бэйэлэриттэн истиһэн, кэнсиэргэ оннооҕор атын сирдэртэн — Хараттан, Бэстээхтэн, Хаптаҕайтан, Россолодаттан, Төхтүртэн тиийэ дьон кэлбит.
Бу, дьыл саҥатыгар буолбут Сиэйэ Уолун кэнсиэрэ дьоҥҥо-сэргэҕэ үгүс үөрүүнү аҕалла.
—Мин Хаатылымаҕа ыалдьыттыы кэлэн баран, наһаа үчүгэй кэнсиэргэ сылдьан, олус диэн астынным. Сиэйэ Уола, Альберт Михайлов, Күндэл ис дууһаларыттан ыллаан-туойан, көр-күлүү кэпсээн-ипсээн, көрөөччүлэри барыбытын бэркэ сэргэхситтилэр… Кэнсиэр олус тэтимнээхтик барда, саала иһэ оргуйан олордо! Бука бары астынан, иэйиилээх ырыаттан, истиҥ көрсүһүүттэн дуоһуйа сынньанан тарҕастыбыт, — диэн санаатын үллэстэр ыалдьыт Людмила Николаевна Сергеева.
Биир тыынынан, өрө көтөҕүллүүлээхтик барбыт кэнсиэр кэнниттэн Хаатылыма нэһилиэгин баһылыгын эбээһинэһин толорооччу Роман Романович Степанов Виктор Ивановка-Сиэйэ Уолугар Махтал суругу, өйдөбүнньүк бэлэҕи туттарда.
“Кулууппут үлэтэ быйылгы дьылга олох үчүгэй!”, — дэһэллэр Хаатылыма олохтоохторо.
edersaas.ru