“Саһарҕа”, “Сулустар”, “Бэс чагда” – бу маннык 3 түөлбэнэн эҕэрдэ нүөмэрдэринэн кэнсиэртээн, ыллаан-туойан, үҥкүүлээн, Мэҥэ Хаҥалас улууһун Хаатылыма бөһүөлэгин олохтоохторо саҥа 2019 сылы үөрэ-көтө көрүстүлэр.
Култуура дьиэтигэр, үтүө үгэс быһыытынан, оҕолуун-уруулуун бука бары муһуннулар. Сүүсчэкэ нэһилиэнньэлээх дьоҕус бүһүөлэк диэбэккин, манна уус-уран самодеятельность сайдыбыт сирэ. Талааннаах дьонунан даҕаны хаһан да итээбэтэх дойду.
Эҕэрдэ эгэлгэ нүөмэрдэрин сэргэ араас куонкурустар, көрүүлэр, көрдөөх оонньуулар ыытылыннылар, үҥкүү-битии буолла. Биэчэр түмүгүнэн Саҥа Дьыллааҕа баал бастыҥ-мааны дьонун таллылар. Ол курдук, бары ирдэбиллэри бэркэ ааһан, Саҥа Дьыллааҕы “Баал королевата” үрдүк ааты Саргылаана Гаврильева ылла, оттон “Баал хоруола” аат Алексей Павловка иҥэрилиннэ.
Кырачааннары да умнубатылар – эбээлээх эһээтигэр Саҥа дьыллыы кэлбит Сайаана саамай элбэх киэргэллээх буолан, тэрийээччилэртэн анал бэлэҕи тутта.
Дьоро киэһэни кулууп дириэктэрэ Фаина Спиридонова бэркэ салайан ыытта.
“Саҥа дьылы олус көхтөөхтүк көрүстүбүт…”, — дэстилэр II Тыыллыма нэһилиэгин олохтоохторо.
Дьон-сэргэ чахчы даҕаны маннык үчүгэй тэрээһинтэн үөрдэ-көттө, сүргэтэ көтөҕүлүннэ, саҥа сылы дьоһуннаахтык саҕалаата.