Мэҥэ-Хаҥалас улууһун II Тыыллыма нэһилиэгэр РФ Төрүт Сокуонугар уларытыылары киллэрэргэ куоластааһын бүгүҥҥүттэн, бэс ыйын 25 күнүттэн, сарсыарда 10 чаастан саҕаланна.
Ол курдук, 261 N-х быыбардыыр учаастакка сарсыарда 10 чаастан бастакы куоластааччылар кэллилэр. Пандемия кэмин учуоттаан, манна, Хаатылыматааҕы (нэһилиэк баһылыга К.К.Попов) Култуура дьиэтигэр үлэлиир учаастакка киирэн истэххэ, бары быраабылалар тутуһуллан, тута температура мээрэйдэниллэр уонна дьоҥҥо барыларыгар мааска, бэрчээкки, уруучука биэрэллэр.
Остуолга, дьон туттарыгар, дезраствор турар. Куоластыы кэлбит дьон быыбардыыр учаастакка сүрүн аанынан киирэллэр уонна кэтэх аанынан тахсаллар. Дьон, туһааннаах кэмҥэ, уочаратынан кэлэр. Бары мааскалаах сылдьаллар.
Оттон аҕам саастаах дьоҥҥо хамыыһыйа чилиэннэрэ аадырыстарынан дьиэлэригэр тиийэллэр.
261N-дээх Хаатылыматааҕы быыбардыыр учаастакка үлэлиир хамыыһыйа бэрэссэдээтэлэ Ньургуйаана Кимовна Матчитова, бэрэссэдээтэли солбуйааччы Андрей Андреевич Местников. Волонтер – Римма Васильевна Трофимова. Кэтээн көрөөччү Фаина Петровна Спиридонова — “Биир ньыгыл Арассыыйа”.
—Бүгүн, куоластааһын бастакы күнүгэр, күнүс 13:23 ч. туругунан, Лукин аатынан уулуссаҕа олорор 9 киһи эрдэ кэлэн куоластаата. Уопсайа быыбардааччыбыт ахсаана 73. Сэттэ киһи сайабылыанньанан куоластыыр. Өссө да кэлиэхтэрэ. Күн иккис аҥаарыгар аҕам саастаахтарга дьиэлэригэр тиийиэхпит, — диэтэ быыбардыыр хамыыһыйа сэкэритээрэ Клара Викторовна Слободчикова.
Татьяна МАРКОВА.