Хаастаах уонна Хонор Москва Коломенскайын ыһыаҕар чиэстэннилэр!

Ааптар: 
Бөлөххө киир:

 Үөрүүлээх уонна күүтүүлээх  түгэн, дьэ, тосхойдо. Уолаттарбыт саха аттарын Хаастааҕы уонна Хонору кытта Москва Коломенскайын ыһыаҕар «Тымныы полюһа Өймөкөөнтөн — Москва куоракка» диэн ыраах айаннарын былааннаммытын курдук, от ыйын 30 күнүгэр ситиһиилээхтик түмүктээтилэр. 

Айанньыттары аттарын кытта удьуор сылгыһыт, Өймөкөөн улууһун Үчүгэй нэһилиэгин олохтооҕо, Дугуйдан Винокуров аҕата уонна Дархан эһэтэ  Семен Винокуров арыаллаан киирдэ. Дугуйдан уолунаан Дарханныын Арассыыйа уонна Саха сирин былаахтарын тутан, аттарыгар олорон киирдилэр. Дарханы Мичил Неустроев арыаллаата. Саха аттара Хаастаах уонна Хонор ааттара Москва сиригэр дорҕоонноохтук ааттанна!

Өймөкөөн сылгыһыттарын Коломенскай ыһыаҕар РФ Бэрэсидьиэнигэр СӨ Бастайааннай бэрэстэбиитэлэ, СӨ Бырабыыталыстыбатын бэрэссэдээтэлин бастакы солбуйааччы Андрей Федотов, ыһыах бочуоттаах ыалдьыта, географическай наука дуоктара, Судаарыстыбаннай Полярнай академия бэрэсидьиэнэ, Нуучча географическай уопсастыбатын бастакы вице-бэрэсидьиэнэ, РФ Наукаларын академиятын чилиэн-кэрэспэдьиэнэ Артур Чилингаров үөрэ көрүстүлэр.

Бу күн биир дойдулаахтара Өймөкөөн улууһун олохтоохторун ааттарыттан Дугуйдааҥҥа, Мичилгэ уонна Дархаҥҥа видеонан эҕэрдэ ыыттылар.

Өймөкөөн улууһун Бочуоттаах олохтооҕо, Өймөкөөҥҥө 79 судаарыстыбаттан туристары күн бүгүҥҥэ диэри көрсөр, улууска туризм салаатын сайыннарыыга үлэлэһэр урбаанньыт Тамара Васильева,  «Биир Ньыгыл Арассыыйа» баартыйа иһинэн үлэлиир “Мэҥэ өйдөбүл” федеральнай бырайыак Өймөкөөн улууһунааҕы салайааччыта Роза Кондакова  эҕэрдэ тылларын тиэртилэр.

Хаастаах уонна Хонор хаһаайыттара Дугуйдан уонна Дархан Винокуровтар үөрэ-көтө: «Айаммыт дьэ түмүктэннэ!» — диэтилэр.

Тоҕус саастаах Дархан Винокуров Арассыыйа дьонугар саха оҕото аҕа оскуолатын ситиһиилээхтик ааспыт холобурун көрдөрдө. Уолаттарбытыгар бу курдук туруоруммут соруктарын ситиһэ туралларыгар баҕарабыт.

Елена ПОТОЦКАЯ, «Саха сирэ» хаһыат.

Хаартыска уонна видео «Оймяконье мое золотое» батсаап бөлөхтөн.

+1
0
+1
0
+1
0
+1
0
+1
0
+1
0
+1
0