Арассыыйаҕа Тыйаатыр сылыгар ыытыллыбыт “Хаарыан хампа кытыл” өрөспүүбүлүкэтээҕи онус үбүлүөйдээх бэстибээл 9 номинациятын кыайыылаахтара билиннилэр.
edersaas.ru
Бу атын регионнарга суох бэстибээли Саха сиригэр СӨ Култуураҕа уонна духуобунай сайдыыга министиэристибэтэ, СӨ Тыйаатырдарын диэйэтэллэрин сойууһа иилээн-саҕалаан ыыталлар. Быйылгы бэстибээл биир уратытынан үбүлүөйдээх бэстибээли РФ үбүнэн өйөөн көмөлөспүтэ буолла.
РФ тыйаатырдарын диэйэтэллэрин сойууһун бэрэссэдээтэлэ Александр Калягин:
“Айар бырайыактары олоххо киллэриигэ ыарахаттар мэлдьи баалларын да иһин, үбүлүөйдээх бэстибээл этэҥҥэ ааспытынан ис сүрэхпиттэн үөрэбин. Бэстибээлгэ өрөспүүбүлүкэ бары кэриэтэ тыйаатырдарын кэлэктииптэрэ кытталларын, араас лиэксийэлэр, испэктээкиллэри дьүүллэһиилэр, артыыстар ырыаларын уонна хоһоон ааҕыыларын куонкурустара ыытыллалларын биһириибин. Онтон тыйаатыр кэскиллээх бириэмийэлэрин туттарыы сиэрэ-туома Тыйаатыр аан дойдутааҕы күнүгэр түбэспитэ кэрэхсэбиллээх. Бу дьоллоох түгэни кыттааччылар уонна көрөөччүлэр өр сылларга умнубаттарыгар эрэллээхпин”, — диэн эҕэрдэтин тиэртэ.
Маннык бэстибээллэргэ өрөспүүбүлүкэ тыйаатырдарын икки кэнники сыллааҕы үлэлэрэ көрдөрүллэллэр. Көрөөччү бастыҥ испэктээкиллэри көрөрө, сөбүлээбит испэктээкиллэрэ, артыыстара “Хаарыан хампа кытыл” бэстибээл кыайыылааҕа буоларыгар “ыалдьара” тыйаатыр сайдарыгар, сонун суоллары тобуларыгар, көрөөччүлүүн биир ситимнэнэригэр бигэ тирэх буолар.
Дьэ, бэҕэһээ, Тыйаатыр аан дойдутааҕы күнүгэр “Хаарыан хампа кытыл” бэстибээл кыайыылаахтара кимнээх буолбуттарын истиэҕиҥ, сэргиэҕиҥ эрэ.
Аан бастаан сценаҕа анал бириэмийэлэр кыайыылаахтара ыҥырылыннылар. Анал бириэмийэлэри туттулар:
“Норуот билиниитэ” (СИА сайтыгар куоластааһын түмүгүнэн) – С.Зверев-Кыыл Уола аатынан “Үҥкүү тыйаатыра “Үрүҥ күн оҕолоро” испэктээкилин иһин;
Дьүүллүүр сүбэ анал бириэмийэтин Эстрада тыйаатыра “Киристэпиэл” испэктээкилин иһин Павел Семенов;
“Эрэл” бириэмийэни Ньурбатааҕы көһө сылдьар судаарыстыбаннай драматическай тыйаатыр худуоһунньуга Туйаара Львова.
Ону сэргэ суруналыыс, театровед Александр Минкин (Москва), Саха тыйаатырын дириэктэрэ Анатолий Николаев наҕараадаланнылар.
Сүрүн бириистэр кыайыылаахтара ааттаннылар.
“Дьахтар иккис былааннаах оруола” номинация кыайыылааҕынан Екатерина Зорина (А.С.Пушкин аатынан судаарыстыбаннай академическай Нуучча драматическай тыйаатыра) “Хопто” испэктээкилгэ Маша оруолун иһин;
“Эр киһи иккис былааннаах оруола” – Степан Федоренко (А.С.Пушкин аатынан судаарыстыбаннай академическай Нуучча драматическай тыйаатыра) “Очи черные” испэктээкилгэ Дилекторскай, Гусар, Доктор оруолун иһин;
“Эр киһи бастыҥ оруола” — Павел Колесов (Олоҥхо тыйаатыра) “Ала Булкун” испэктээкилгэ Ала Булкун оруолун иһин;
“Дьахтар бастыҥ оруола” – Венера Федотова (Д.К.Сивцев-Суорун Омоллоон аатынан Опера уонна балет тыйаатыра) “Корсар” балекка Медора оруолун иһин;
“Бастыҥ сценография” – Михаил Егоров “Мин доҕорум Гамлет”, “Төлкө” испэктээкиллэргэ үлэлэрин иһин;
«Көстүүмҥэ худуоһунньук бастыҥ үлэтэ» — Прасковья Павлова (Үүнэр көлүөнэ тыйаатыра) “Таптал тыыннааҕын тухары” испэктээкилгэ үлэтин иһин;
“Режиссер бастыҥ үлэтэ” —— Сергей Потапов “(Б.Ойуунускай аатынан Саха академическай тыйаатыра) “Мин доҕорум Гамлет” испэктээкилин иһин;
“Оҕо бастыҥ испэктээкилэ” — “Алиса мүччүргэннээх сырыылара” (А.С.Пушкин аатынан судаарыстыбаннай академическай Нуучча драматическай тыйаатыра);
“Бастыҥ испэктээкил” үс кыайыылаах ааттанна:
— “Саха дьахталларын мэтириэттэрэ” (Олоҥхо тыйаатыра);
-“Корсар” (Д.К.Сивцев-Суорун Омоллоон аатынан Опера уонна балет тыйаатыра);
-“Мин доҕорум Гамлет” “(Б.Ойуунускай аатынан Саха академическай тыйаатыра).
“Хаарыан хампа кытыл” бэстибээли аан бастаан тэрийбит Арассыыйа норуодунай артыыһа, “Хаарыан хампа кытыл” бэстибээл президенэ Андрей Борисов эппитинии, биһиги бэстибээлбит Саха сиригэр эрэ буолбакка, Арассыыйаҕа элбэх култуурунай дьайыылар катализатордарынан буолла.
Надежда ЕГОРОВА, “Саха сирэ”, edersaas.ru
Василий КРИВОШАПКИН түһэриилэрэ