Хаартысканан кэпсиибит: “Сайсарыга” сайыҥҥы сыана

Бөлөххө киир:

Олохтоох эти-үүтү, оҕуруот аһылыгын барытын биир сиртэн атыылаһар санааттан, иллэрээ күннээҕитэ «Сайсары» ырыынакка бара сырыттыбыт. Атыы-эргиэн ырыынак тиэргэниттэн саҕаланар. Өҥүрүк куйаас буолан, кыһыны-сааһы быһа баһылаан олорбут эттээх-үүттээх, балыктаах урбаанньыттары оҕуруот аһынан, фруктанан эргинэр кэлии дьон солбуйбуттар.

Ол да буоллар, ырыынак икки мэндиэмэннээх дьиэтигэр Таатта, Уус Алдан эмис этэ, Кэбээйи сибиэ­һэй собото, Аллайыаха чыыра барыта баар. Ырыынакка, буоларын курдук, дьон үллэҥнэс. Ким эрэ оҕуруот аһын, сорох дьон ынах этин, балыгы көрдүүллэр. Оҕурсу, помидор сыаната түһэ илигэ сөхтөрдө. Олохтоох уонна кэлии оҕурсу киилэтин 200 – 260 солкуобайтан түһэрбэттэр. Помидор сыаната черешнятааҕар эрэ удамыр. Киилэтэ 400 солкуобайтан намтыы илик. Черешня 500 солкуобайынан быһыллыбыт. Оттон клубника киилэтэ 1000 солкуобай.
Эриэппэ луук 100, моркуоп 130, хортуоппуй 140, хаппыыста 150, биэрэс 350 солкуобайга атыыланаллар. Ырыынакка эт, үүт, балык, отон сыаната дьыл кэмиттэн тутулуктаах. Хайа эрэ кэмҥэ үрдүүр, ханнык эрэ кэмҥэ арыый намтаан ылар.

Ырыынак иккис этээһигэр сип-сибиэһэй, бэҕэһээ эрэ Ньидьили күөлгэ уста сылдьыбыт эмис собону атыыга аҕалбыттар. Олох хамсыы сылдьар. Сыаната 350 солкуобай. Арааһа, биир киилэҕэ биир эрэ собо кэлэрэ буолуо. Тоҥмутунан собону 300 солкуобайга атыылыыллар. Оттон уомул киилэтэ 700, Аллайыаха чыыра 800, муксуун 700 солкуобайынан быһыллыбыт.
Сибиэһэй ынах этэ 600 солкуобайтан саҕаланар, саамай эмиһэ 900 солкуобай. Таатта убаһатын этэ 700 солкуобай. Сааскытааҕар эт сыаната арыый да үрдээбит.
Убаһа хартата 800, ынах иһэ 400, ынах быара 600, эриллибит эт 500 солкуобайынан быһыллыбыт.
Саҥалаах-иҥэлээх, киирбит-тахсыбыт дьон атыыһыты кытары кэпсэтэн, сыананы арыый да түһэрсэн атыылаһаллар. Бу ырыынак бэйэтин сокуона.

edersaas.ru

+1
0
+1
0
+1
0
+1
0
+1
0
+1
0
+1
0