Хаартысканан кэпсиибит: Дьокуускай сыанатыгар – «Сыгый Кырынаастыыр»
Муус устар 13 күнүгэр саха уһулуччулаах композитора Марк Николаевич Жирков төрөөбүтэ 130 уонна САССР 100 сылын чэрчитинэн Дьокуускайга “Сыгый Кырынаастыыр” национальнай опера көрдөрүллэн, улахан сэргэхсийиини таһаарда.
Марк Жирков уонна Герман Литинскэй опералара Бүлүү улууһун уус-уран самодеятельноһын, Сергей Зверев-Кыыл Уолун аатынан Үҥкүү национальнай тыйаатырын, П.А.Ойуунускай аатынан Саха тыйаатырын худуоһунньуктарын күүстэринэн Опера уонна балет тыйаатырыгар туруорулунна.
Бу холбоһуктаах бырайыагы биир сыл анараа өттүгэр толкуйдаабыттара. Операны туруорарга Бүлүү улууһун араас нэһилиэктэриттэн – Чочуттан, Бөтүҥтэн, Тыымпыттан, 2-с Күүлэттэн уонна Бүлүү куораттан барыта 120 киһи кытынна.
Василий ПАРНИКОВ, «Кэнчээри» оҕо ансаамбылын салайааччыта, РФ уонна САССР култууратын үтүөлээх үлэһитэ:
— Саха норуотун култуурата сайдыытыгар биир дьоһун хардыы оҥоһуллар өрөгөйдөөх түгэнигэр сылдьан астынан кэллим.
Бүтэй Бүлүү улууһун баһылыга Сергей Винокуров сатабыллаах дьаһалынан, тэрийиитинэн тыа сирин талааннаах үлэһит дьоно, самодеятельнай артыыстар аан бастаан ускуустуба чыпчаал көрүҥүн — операны ситиһиилээхтик туруоран, саха норуотун талба талаанын көрдөрөн, култуура устуоруйатыгар көмүс буукубанан суруллар түгэни бэлэх ууннулар.
Суруналыыс Надежда Егорова «Дьокуускай сыанатыгар – «Сыгый Кырынаастыыр» национальнай опера» диэн суруйуутун «Саха сирэ» хаһыат чэппиэрдээҕи нүөмэригэр ааҕыҥ.
edersaas.ru