Өрөбүл күннэргэ ас-үөл сыаната төһө буолбутун, үрдээбитин дуу, сааскытааҕар оннунан турарын дуу көрөөрү-истээри Аллараа Бэстээх кууһунан атыылыыр маҕаһыыннарыгар сырыттыбыт.
Бу саас эмиэ манна сылдьан турабыт. Кулун тутарга бурдук, саахар “дэписсиит” буолуо диэн социальнай ситимнэргэ олоҕо суох сурахтары тарҕатан, куорат олохтоохторо эрэ буолуо дуо, чугастааҕы улуустартан тиийэ үгүс дьон Аллараа Бэстээх маҕаһыыннарыттан арахпатахтара. Холобур, кулун тутарга “Азия” атыы-эргиэн кииҥҥэ “Алейка” бурдук биир киилэтэ 51 солкуобайга атыыланар эбит буоллаҕына, билигин “Умид” кууһунан атыылыыр маҕаһыыҥҥа 44 солкуобайга турар.
Бу саас үүнээйи арыытын сыаната бас баттах барыа диэн, үгүс дьон тааранан хааччыммыттара. Биир лиитирэлээх “Санни голд” арыы кулун тутарга 195-200 солкуобайга тиийэ сылдьыбыта. Билигин дьэ “былдьаһыктаах” “Санни голд” арыыбыт кууһунан атыылыыр маҕаһыыннарга 150 солкуобайга, оттон көннөрү маҕаһыыннарга 165 солкуобайга атыыланар.
Аллараа Бэстээх маҕаһыыннарыгар сылдьан көрдөххө, бу сааскытааҕар сыана арыый намтаабыт курдук. Бурдугу, саахары, үүнээйи арыытын кулун тутарга аҕыйахтыы киилэнэн атыылыы сылдьыбыт буоллахтарына, билигин хааччахтааһын диэн суох.
edersaas.ru