Чурапчы улууһун Төлөй нэһилиэгин А.С.Бродников аатынан «Аартык» Норуот айымньытын дьиэтэ Саҥа дьылы көрсө «Симэммит мааныкай» диэн бэртээхэй тэрээһини ыытта.
edersaas.ru
Тэрийээччилэр куйаар ситиминэн барбыт күрэскэ өрөспүүбүлүкэ араас муннугуттан хаһаайкалартан ынахтарын симэмээбит хаартыскаларын хомуйдулар.
Күрэс сэтинньи 3 күнүттэн сэтинньи 19 күнүгэр диэри ыытылынна. Тыа хаһаайыстыбатын үлэһитин өрө тутар сыаллаах аһаҕас хаартыска куонкуруһугар, бэл, Дьааҥы, Муома кудук хоту уонна арктическай улуустар кыттыны ыллылар.
Кыттааччыларга ирдэбил быһыытынан Саха сирин хайа баҕарар муннугуттан бэйэ хаһаайыстыбалаах ыаллар сүөһүлэрин (хас баҕарар саастаах оҕус да, тыһы да ынах буолуон сөп) киэргэтэн, хаартыскаҕа түһэрэн ыытар сорук туруорбуттара.
Оҕус эбэтэр ынах хаартыскатын @teleydnt «инстаграм» страницаҕа ыытыахтаахтар диэн балаһыанньалаах.
Кыайыылааҕы Төлөйдөөҕү норуот айымньытын дьиэтин үлэһиттэрэ, Төлөй тыа хаһаайыстыбатын исписэлииһэ састааптаах дьүүллүүр сүбэ сыаналаата.
«Симэммит мааныкай» аһаҕас хаартыска куонкуруһун кылаан кыайыылааҕынан Таатта улууһун Баайаҕа олохтооҕо Ольга Бурнашева үс саастаах Оотой уонна Тоотой игирэ оҕустара мотуруос таҥаһын таҥнан кыайыылааҕынан таҕыстылар. Хаартыска аата «Иккиэн бииргэ» диэн. Муҥутуур кыайыылаахха 2000 солкуобай харчыны ыыттылар.
