“Орто дойду” зоопаркаҕа төрөөбүт үрүҥ эһэ оҕото Хаарчаана саҥа дьиэлэннэ. Кинини 1 сааһын туолаатын кытары, Ленинградтааҕы зоопаркаҕа ыыппыттара.
edersaas.ru
Оҕо көмүскэлин күнүнэн киниэхэ саҥа, киэҥ вольеры бэлэмнээтилэр. Манна сүүрэн-көтөн оонньууругар анал былаһааккалаах, сөтүөлүүрүгэр бассейннаах (онто уута ыраастанарыгар инженернэй систиэмэлээх) тыастан-уустан хорҕойоругар, сынньанарыгар бүччүм арҕахтаах. Вольер аттыгар кини эбэтин Услада дьиэтэ баар.
2011 сыллаахха бу зоопаркаттан Ломоносов диэн атыыр эһэни Саха сиригэр ыыппыттара. Ломоносов уонна Колымана Хаарчаананы төрөппүттэрэ. Өрөспүүбүлүкэ олохтоохторо бары кырачаан Хаарчаана улаатарын кэтээн көрбүттэрэ, таптаабыттара. Ийэтиттэн арааралларын, ыраах ыыталларын бары да ыарыылаахтык ылыммыттара.
Оттон Хаарчаана биир сылы быһа хагдаҥ эһэлэр вольердарыгар олорбута. Ол кыараҕас этэ уонна саһан сытан сынньанар сирэ суоҕа. Кини сөтүөлүүрүн, мээчигинэн оонньуурун наһаа сөбүлүүрэ. Кырачаан мэник-тэник бэйэтин, эйэҕэс майгытын зоопарк үлэһиттэрэ да, көрөөччүлэрэ да олус сөбүлээбиттэрэ.
Хаарчаананы саҥа дьиэтигэр бэс ыйын 1 күнүгэр 12 чааска (Москва бириэмэтинэн) киллэриэхтэрэ. Онно ким баҕарар кэлэн көрүөн сөп.
Ангелина Васильева, “Саха сирэ” хаһыат, edersaas.ru