Хаарчаана Иванова кондитердар аан дойдутааҕы күрэстэригэр кыайда. Бу күрэскэ 59 дойдуттан 800-тэн тахса чулуу кондитердар үлэлэрэ кыттыыны ылбыт.
edersaas.ru
Кини аан дойдутааҕы Cake International Virtual Show 2020 диэн күрэскэ “декоративная композиция” көрүҥҥэ кыттарыгар олоҥхо көстүүтүн – айыы бухатыыра Ньургун Боотур абааһы уолун кытта охсуһа сылдьарын саахардаах паастаттан чочуйан оҥордо.
“Икки эйгэ, икки дойду охсуһуулара – орто дойду бухатыырын уонна аллараа дойду абааһытын киирсиилэрэ билиҥҥи балаһыанньаны санатар. Үрүҥ халааттаах аанньаллар киһи-аймаҕы быыһыыр туһуттан, дьону өлөрөр вируһу кытары охсуһаллар”, — диэн Хаарчаана үлэтин билиһиннэрэригэр суруйбут.
Кини үлэтин балаҕан ыйыгар оҥорон, Англияҕа ыыппыт эбит. Пандемия буолан, күрэс онлайн көрүҥүнэн ыытыллыбыт. Хаарчаана Иванова маннык үрдүк таһымнаах күрэххэ аан бастаан кытынна уонна тута кыайыылаах аатын ылла.
Талааннаах кондитер Сунтаар улууһун Элгээйитигэр оҕо көрөн олорон, 2014 сылтан туортары оҥорор буолбут. Бэйэтэ Нам Бөтүҥүттэн төрүттээх. Араас быһыылаах, сиэдэрэй киэргэтиилээх, ураты туортара үгүс дьону сөхтөрбүттэрэ. Үгүстэр “бу чахчы туорт дуо, сиэниллэр дуо?” диэхтэригэр диэри уран оҥоһуулаах, кэрэ көстүүлээх буолаллара. Билигин Ивановтар Дьокуускайга көһөн кэлэн олороллор.
Ангелина Васильева, “Саха сирэ” хаһыат, edersaas.ru