Хаарбах дьиэттэн дьону көһөрүү бырагыраамата 2019 с. иккис түһүмэҕэ саҕаланар. Саха сиригэр бу сыалга туһанарыгар федерацияттан 60 млрд солк. көрүллүбүтэ. Бу туһунан Ил Дархан Айсен Николаев бэҕэһээ Дьиэ-уот, хомунаалынай хаһаайыстыбаны саҥардыы фондатыгар буолбут мунньахха эттэ.
edersaas.ru
Санатан эттэххэ, бу бырагыраама 2013 с. саҕаламмыта. Биэс сыл устата биһиги өрөспүүбүлүкэбитигэр 2012 с. диэри испииһэккэ киирбит уопсайа 477 тыһ. кв м иэннээх хаарбах дьиэлэр көстүлэр. Билигин бастакы түһүмэххэ киирбит дьиэлэртэн Нерюнгри оройуонугар Серебрянай Бор бөһүөлэгэ былаанын толорбокко сылдьар. 2024 с. диэри өссө 920 тыһ. кв м иэннээх дьиэ көһүөхтээх.
Дьиэни-уоту, хомунаалынай хаһаайыстыбаны саҥардыы фондатын кэтээн көрөр сэбиэтин бэрэссэдээтэлэ Сергей Степашин Саха сирэ ханнык да эрэгийиэннээҕэр элбэх дьиэни-уоту былааҥҥа киллэрбитин бэлиэтиир. Ону сэргэ дойду үрдүнэн хаарбах дьиэлэри саҥардыыга 400 млрд солк. көрүллүбүтүн этэр.
Ил Дархан Айсен Николаев РФ бэрэсидьиэнэ Владимир Путин дьаһалынан 60 млрд солк. көрүллүөхтээҕин этэр. “Саха Өрөспүүбүлүкэтэ бырагыраама иккис түһүмэҕэр барыта 900 тыһ. кв м иэннээх дьиэни көһөрөргө былааннаан олорор. Санатан этиим, Арассыыйа үрдүнэн көрүллүбүт үп 15 % Саха сиригэр бэриллиэҕэ. Бу бырагырааманы олоххо киллэриигэ тахсыбыт алҕастар кэнэҕэскитин хатыланыахтара суоҕа дии саныыбын. Билигин хаарбах дьиэҕэ олорор Саха сирин олохтоохторо саҥа, сылаас дьиэлэниэхтэрэ”, — диэн иһитиннэрэр кини.
Аграфена КУЗЬМИНА, “Саха сирэ” хаһыат.