Хаарбах туруктаах дьиэлэртэн дьону көһөрүү уонна оскуолаларга эбии миэстэни таһаарыы бырагыраамалара толоруллуохтаахтар
Сүбэ мунньахха вице-премьер Кирилл Бычков, салаа министиэристибэлэр бэрэстэбиитэллэрэ, улуус баһылыктара кыттыыны ыллылар.
Суһал ыстаапка Дьокуускай куоракка уонна муниципальнай тэриллиилэргэ олорор дьиэлэри тутуу боппуруостара көрүлүннүлэр. Санатан эттэххэ, быйыл «Переселение граждан из аварийного жилищного фонда на 2019-2025 годы» өрөспүүбүлүкэтээҕи аадырыстаах бырагыраама иитинэн 25 тыһыынча гражданнар 461 тыһ. кв. миэтэрэлээх дьиэттэн көһөрүллүөхтээхтэр. Маны таһынан быйыл Дьокуускайга №5 уонна №12 оскуолаларга итиэннэ Хатастааҕы орто оскуолаҕа эбии тутуулар ыытыллан үлэҕэ киллэриллиэхтээхтэр.
Сүбэ мунньах кэмигэр инвестиционнай бырагыраамалар олоххо киириилэрин тула кэпсэтии таҕыста. Билигин Горнай улууһун Бэс Күөлүгэр оскуоланы, Аллараа Бэстээххэ култуура киинин, Кыһыл Сыырга гаас магистралын тутууга, Үөһээ Бүлүүгэ М.А. Алексеев аатынан өрөспүүбүлүкэтээҕи лиссиэй-интэринээти хапытаалынай өрөмүөннээһиҥҥэ бэдэрээтчити көрдөөһүҥҥэ куонкурус ыытыллар.
«Төһө да баан бырыһыан стаавкатын үрдэппитин итиэннэ тутуу матырыйаалын сыанана улааппытын үрдүнэн, судаарыстыбаннай бырагырааманан хаарбах туруктаах дьиэлэртэн дьону көһөрүү уонна оскуолаларга эбии миэстэни таһаарыы хайаан да үлэҕэ киллэриллэн толоруллуохтаах», — диэн Айсен Николаев бэлиэтээн эттэ.
Суһал ыстаап чилиэннэригэр эбийиэк симиэтэтэ үрдүүр түгэнигэр, федеральнай үбүлээһин кээмэйин улаатыннарыыга үлэ ыытыллыахтааҕа этилиннэ. Оттон «Переселение граждан из аварийного жилищного фонда на 2019-2025 годы» бырагырааманан тутууну ыытар хампаанньаларга үлэһит ахсаанын элбэтэргэ, тутууну тэтимирдэргэ сорудахтанна.
СӨ Ил Дарханын уонна бырабыыталыстыбатын пресс-сулууспата