Саахалланар туруктаах дьиэлэртэн дьону көһөрүүгэ федеральнай бырагыраамалар баар буолуохтарыттан, Арассыыйа үрдүнэн үгүс киһи саҥа кыбартыыранан хааччылынна. Дьокуускай куоракка, ордук киин кыбартаалларга, хаарбах туруктаах дьиэ лаппа аҕыйаата. Онон эргэни саҥа солбуйан, хастыы да мэндиэмэннээх таас дьиэлэр тутуулара балачча элбээтэ.
2019 СЫЛГА 1860 КИҺИ САҤА КЫБАРТЫЫРАҔА КӨСТӨ
Статистика сыыппараларын сыымайдаан көрдөххө, Арассыыйаҕа 2013-2017 сылларга 10,63 мөлүйүөн квадратнай миэтэрэ иэннээх дьиэттэн 678,5 тыһыынча киһи көһөрүллүбүтэ. Бу баараҕай суолталаах бырагыраама олоххо киллэриллэн, уонунан сыллар тухары олорор усулуобуйаларын сатаан тупсарбакка сылдьыбыт Арассыыйа олохтоохторо саҥа дьиэҕэ көһөн киирбиттэрэ.
Онтон ааспыт сылга өрөспүүбүлүкэ үрдүнэн 1860 киһи көһөрүллүбүтүн туһунан СӨ Тутууга министиэристибэтин пресс-сулууспата иһитиннэрдэ.
2019-2020 сылларга көһөрүү бырагырааматын иккис түһүмэҕэр уопсайа 85,87 тыһыынча кв. миэтэрэ иэннээх саахалланар дьиэттэн 4903 киһи көһөрүллүөхтээх.
Билиҥҥи туругунан өрөспүүбүлүкэҕэ уопсайа 1 156,56 кв. миэтэрэ иэннээх саахалланар туруктаах дьиэҕэ олорор 61,8 тыһыынча киһини көһөрүү соруга турар. Бу соругу олоххо киллэриигэ 111 539,9 мөл. солкуобай наада.
4 КЫБАРТЫЫРАТТАН САҔАЛААН 88-КА ДИЭРИ
Тутуу аҥаардас куораттарга эрэ буолбакка, тыа сиригэр эмиэ хото ыытыллар.
Холобур, Сунтаар улууһа «Хаарбах туруктаах олорор дьиэлэртэн көһөрүү» бырагыраамаҕа күүскэ ылсыһан үлэлээбитэ хаһыс да сылыгар барда.
Бүгүҥҥү туругунан, Сунтаарга «Главстройкомплекс» тэрилтэ Октябрьскай уулусса 76/2 «Б» куорпуһугар 14 кыбартыыралаах, «В» куорпуска 20 кыбартыыралаах дьиэни быйыл тутан киллэриэхтээх. Бу тэрилтэ 88 кыбартыыралаах дьиэ бастакы уочаратын саҕалаабыт. 29 кыбартыыралаах дьиэ эһиил киириэхтээх. «Сунтарэнерго» тэрилтэ Илимнииргэ 8 кыбартыыралаах, Туойдаахха 4 кыбартыыралаах дьиэлэри быйыл үлэҕэ киллэриэхтээх. «Дабаан-строй» тэрилтэ Сунтаарга 47 кыбартыыралаах дьиэ тутуутун саҕалаата. Маны таһынан «Сунтарэнерго» Аллаҥаҕа 8 кыбартыыралаах уонна Илимнииргэ 8 кыбартыыралаах дьиэлэри туталлар. Бу күннэргэ «Айан-суол» тэрилтэ Кутанаҕа 12 кыбартыыралаах саҥа уопсай дьиэ сыбаайатын түһэрдэ.
ХАХЫЙАХ УЧААСТАГАР 8 ЫАЛ САҤА ДЬИЭ КҮЛҮҮҺҮН ТУТТА
Чурапчы улууһун ыраах сытар Хахыйах учаастагар 8 ыалга саҥа дьиэ күлүүһүн туттардылар. Бу туһунан улуус дьаһалтатын пресс-сулууспата иһитиннэрдэ.
Ол курдук, түөртүү кыбартыыралаах толору хааччыллыылаах икки дьиэ «Хаарбах уонна саахалланар туруктаах олорор дьиэ пуондата» бырагырааманан тутулунна. Чурапчы улууһун баһылыга Андрей Ноговицын: «Биһиги улууспутугар бу дьоһун суолталаах түгэн. Туһааннаах бырагырааманан 104 кыбартыыра тутуллуохтааҕыттан, аҕыһын бастакынан Хахыйахха тутан үлэҕэ киллэрдибит. Биһиги улууспутугар кыра сэлиэнньэлэри өйүүр уонна сайыннарар бэлиитикэни ыытабыт, – диэн санаатын үллэһиннэ. «Хаарбах уонна саахалланар туруктаах олорор дьиэ пуондата» бырагыраама үлэлиэҕиттэн улууска уопсайа толору хааччыллыылаах 350 кыбартыыра тутуллубутуттан, 60-на нэһилиэктэргэ. Бырагыраама иккис түһүмэҕэр, ол эбэтэр 2024 сылга диэри 600 ыал саҥа дьиэ күлүүһүн тутуохтара.
Билиҥҥитэ «Саахалланар уонна хаарбах туруктаах дьиэлэртэн көһөрүү” бырагырааматын олоххо киллэриигэ өрөспүүбүлүкэ 36 муниципальнай оройуоннара үлэлииллэр. Онон олус наадалаах бырагыраама үлэлиэҕиттэн, эргэ дьиэлэрин саҥа тутуулара солбуйдулар.
edersaas.ru