Хаарбах дьиэттэн көһөрүү бырагыраамата өрөспүүбүлүкэ таһымыгар хонтуруолланыа

Серебрянай Бор бөһүөлэгин олохтоохторун ыйытыыларыгар хоруйдууругар Ил Дархан Айсен Николаев өрөспүүбүлүкэҕэ дьону хаарбах дьиэттэн көһөрүү бырагыраамата Ленскэйтэн уонна Серебрянай Бортан тутулуктанан, бүгүҥҥү күҥҥэ ситэри толорулла илигин бэлиэтээтэ. 

Ил Дархан Айсен Николаев эппитинэн, дойду үрдүнэн 2017 сылга диэри үлэлээбит бырагыраамаҕа Серебряный Бор бүгүҥҥү күҥҥэ дьону хаарбах дьиэттэн көһөрүүгэ саамай кыһалҕалаах сиринэн буоларын бэлиэтээтэ диэн суруйаллар СИА. Өрөспүүбүлүкҕэ Ленскэйтэн уонна Серебрянай Бортан тутулуктанан, ити бырагыраама ситэри толоруллубатах.

Ленскэйгэ дьиэлэр бэлэмнэр кэриэтэ, судаарыстыбаннай хамыыһыйа туттаҕына, дьон-сэргэ сэтинньи онус күннэрин эргин көһөн киириэхтээхтэр. Оттон Серебрянай Борга быһыы-майгы уустук.  234 кыбартыыра үлэҕэ киириэхтээҕиттэн, бэдэрээччит биэс дьиэни туппут. Ол дьиэлэр 77—89 % бэлэмнэр эрээри, сыл устата онно үлэ ыытыллыбатаҕын кэриэтэ.

СӨ тутуу министиэристибэтэ атын тутуу хампаанньаларын кытары үлэлэһэрин түмүгэр, икки дьиэҕэ үлэ салҕанар. 81 кыбартыыраны иккис ырыынактан ыларга быһаарыллыбытыттан, сороҕо атыылаһыллыбыт, сорох гражданнар компенсация ылбыттар.

«Бу сүдү суолталаах бырагырааманы  бөһүөлэккэ, оройуоҥҥа  хонтуруоллааһыҥҥа муниципальнай былаастар, тутуу министиэристибэтин  өттүттэн ситэтэ суох үлэлэр ыытыллыбыттара көстөр. Дьокуускайга тыһыынчанан кыбартыыраҕа дьону көһөртөөбүт буоламмыт, бу салааны муниципалитет салалтата саҕаланыаҕыттан бүтүөр диэри хонтуруолга ылыахтааҕын өйдүүбүн», — диэтэ Николаев. Маныаха кини хаачыстыбаҕа, болдьоххо элбэх сэмэ-суҥха этиллибитин ыйда. Итиэннэ федеральнай үп көмөтүнэн кэлэр сылтан хаарбах дьиэттэн көһөрүү бырагыраамата саҕаланыахтааҕын, ол өрөспүүбүлүкэ таһымыгар хонтуруолланыаҕын эттэ.