“2019-2025 сс. хаарбах дьиэттэн көһөрүү” өрөспүүбүлүкэтээҕи аадырыстаах бырагыраама хайдах быһыылаахтык бара турарын туһунан анал биэдэмистибэлэр салайааччыларын, муниципальнай тэриллиилэр баһылыктарын, тутуу үлэһиттэрин мунньан, Саха сирин бырабыыталыстыбатын бэрэссэдээтэлин маҥнайгы солбуйааччыта Кирилл Бычков ырытыы мунньах ыытта.
edersaas.ru
Кирилл Бычков этэринэн хаарбах дьиэттэн көһөрүү тэрээһинэ Саха сиригэр бары эрэгийиэннэртэн муҥутуур улахан далааһыннаах буолара былааннаммыт – 2025 сылга диэри 1 мөлүйүөн кв. м. хаарбах дьиэ пуондатыттан дьон көһөрүллүөхтээх.
2021 сылга өрөспүүбүлүкэ үрдүнэн 215 тыһ. кв. миэтэрэ иэннээх дьиэлэргэ олорор 12 тыһ. кэриҥэ дьон көһөрүллүөхтээх, ити урут былааннаммыттан 1,5 төгүл элбэх.
Көһөрүллэр дьоҥҥо анаан элбэх кыбартыыралаах 55 дьиэ үлэҕэ киириэхтээх. Онно уопсайа 69,95 тыһ. кв.м. иэннээх 1491 кыбартыыра атыылаһыллара былааннанар.
Мунньах кыттыылаахтара 2022 сыл бастакы түһүмэҕэр кыттыыны ылыыга муниципальнай оройуоннар сайаапкаларын киллэрии уонна өрөспүүбүлүкэтээҕи аадырыстаах бырагыраама барылын дьүүллэстилэр. Тутуу министиэристибэтин иһитиннэриитинэн, билигин сайаапкалар 15 муниципальнай тэриллиилэртэн бэрилиннилэр. Хаалбыт олохтоох салайыныы уорганнарыгар сайаапкалары кылгас кэм иһигэр сайаапкаларын бэлэмнииргэ уонна көмүскүүргэ сорудах бэрилиннэ.
Кирилл Бычков сүбэ мунньаҕын кэмигэр улуустар баһылыктарын, ону сэргэ Дьокуускайга уонна Өлүөхүмэҕэ элбэх кыбартыыралаах дьиэлэри тута сылдьар «Мегаполис» ХЭУо, «Дороги Олекмы» ХЭУо бырагыраама 2020 сыллааҕы түһүмэҕин туһунан дакылааттарын иһиттэ. Тутуу графигын ыһыктыбат туһугар, тутааччылар муниципалитеттары кытта эбии үлэһит күүһү тардалларыгар уураах ылынна. 2020 сыллааҕы бырагыраама чэрчитинэн билигин элбэх кыбартыыралаах 49 дьиэ тутуллан, бу сыл бүтүүтэ үлэҕэ киириэхттэхтэр.
— Сүрүн сыалбыт – дойду үрдүнэн урутуур балаһыанньабытын мүччү туппакка үлэлээн иһэргэ сытар. Онон үлэ тиһигэ быстыбатын туһугар күннээҕи тэрээһин сорудахтарын түргэнник быһааран иһиэхтээхпит. Маннык моһуоннаах мунньахтар өссө даҕаны тэриллиэхтэрэ – диэн түмүктээтэ Саха сирин бырабыыталыстыбатын бэрэссэдээтэлин маҥнайгы солбуйааччыта Кирилл Бычков
«Саха сирэ» хаһыат, edersaas.ru
Хаартыска sakha.gov.ru