Ситэриилээх былаас отчуотун түмүктүүр быһа эпииригэр үгүс ыйытыы киирдэ. Олохтоохтортон ыйытыы ахсаана элбэх буолан, эпиир бириэмэтин арыый да уһатан биэрдилэр.
Таатта улууһун Чычымаҕыттан Анна Егоровна эрийэн, олохтоохтор квартальнай хочуолунай тутуутун өрүү туруорсалларын туһунан эттэ. «Быйыл эмиэ хочуолунай тутуутун эрэнэ кэтэһэбит», — диэн тоһоҕолоон эттэ.
Онуоха вице-премьер Дмитрий Садовников сыллата өрөспүүбүлүкэҕэ сүүрбэччэ хочуолунай тутулларын уонна саҥардылларын туһунан иһитиннэрдэ.
-Быйыл эмиэ сүүрбэччэ эбийиэги былаанныыбыт. Таатта Чычымаҕар инвестиционнай бырагыраама иитинэн саҥа хочуолунай быйыл тутуллуоҕа, — диэн вице-премьер эттэ.
Салгыы Нам улууһуттан хаарбах дьиэттэн саҥа кыбартыыраҕа көспүт эр киһи эрийэн ыйытыы биэрдэ. Ол курдук бырагыраама иитинэн кыбартыыраҕа эрэ буолбакка, чааһынай дьиэҕэ (ИЖС) эмиэ көһөрөргүт буоллар диэн этии быһыытынан санаатын эттэ.
Манна туһаайан Кирилл Бычков:
— 2021 сыл ахсынньы 30 күнүгэр «О Фонде содействия реформированию жилищно-коммунального хозяйства» федеральнай сокуоҥҥа уларытыылар киирбиттэрэ. Онон «Хаарбах дьиэттэн дьону көһөрүү» бырагыраамаҕа олоҕуран, дьон-сэргэ бэйэлэрин дьиэлэрин тутталларыгар кыах бэрилиннэ. Билигин Тутуу министиэристибэтэ бу сокуону олоххо киллэрии механизмын оҥоро сылдьар, — диэн эттэ.
Санатан эттэххэ, саахалланар туруктаах олорор дьиэ пуондатыттан гражданнары көһөрүү бырагырааматын чэрчитинэн бырагырааманы олоххо киллэрии саҕаланыаҕыттан (2019-2021 сс.) 325,2 тыһ. кв.м иэннээх дьиэттэн-уоттан 18,1 тыһ. киһи көһөрүлүннэ, ол иһигэр 2021 сылга 245,5 тыһ. кв.м иэннээх дьиэттэн-уоттан 12 тыһ. киһи көһөрүлүннэ, 82 элбэх кыбартыыралаах дьиэ тутуллан үлэҕэ киирдэ.
edersaas.ru