Хаарбах дьиэттэн дьону көһөрүү бырагырааматынан ыытыллар үлэ бэрэбиэркэлэннэ
Ил Дархан уонна Бырабыыталыстыба дьаһалталарын мониториҥҥа итиэннэ хонтуруолга департамена Ил Дархан Егор Борисов сорудаҕынан, ыам ыйын 15-30 күннэригэр Кэбээйи, Мииринэй, Нерюнгри, Ньурба уонна Өлүөхүмэ оройуоннарыгар хаарбах дьиэттэн дьону көһөрүү бырагырааматынан ыытыллар үлэни-хамнаһы бэрэбиэркэлээбитэ. edersaas.ru
Ол түмүгэ бэҕэһээ өрөспүүбүлүкэ баһылыгын ыйаахтарын, сорудахтарын, дьаһалларын толорууну көрөр-истэр биэдэмистибэлэр икки ардыларынааҕы хамыыһыйаҕа иһитиннэрилиннэ.
Ил Дархан уонна Бырабыыталыстыба дьаһалталарын мониториҥҥа итиэннэ хонтуруолга департаменын салайааччы Алексей Филиппов «2013-2017 сс. гражданнары хаарбах туруктаах олорор дьиэттэн көһөрүү» өрөспүүбүлүкэтээҕи бырагыраама көдьүүһүн үрдэтэр усулуобуйалары тэрийэр дьаһал ылыллара наадатын бэлиэтээтэ. Онон бырагыраама олоххо киириитигэр уонна миэстэҕэ куораты тутуу сокуонун ирдэбиллэрин тутуһарга эппиэтинэһи үрдэтии боппуруоһун көрөргө эттэ. Олорор дьиэ-уот пуондатын уонна хомунаалынай инфраструктура хаачыстыбатын үрдэтэр, бырагыраама ырычаахтарыгар бырайыактарынан салайыы принциптэрин киллэрэр тоҕоостоох диэтэ.
Бэрэбиэркэ көрдөрбүтүнэн, сорох тутааччылар тутар-таҥар үлэни балаҕан ыйын 1 күнүгэр диэри бүтэрэр кыахтаахтар, ол эрээри саҥа эбийиэктэргэ бас билии быраабын судаарыстыбаннай регистрацията бастаан тутааччы аатыгар, онтон муниципальнай тэрээһиҥҥэ оҥоһуллар буолан, эбийиэк үлэҕэ киллэриллиитин болдьоҕун уһатар эбит.
Мунньахха Нерюнгри, Ньурба оройуоннарын, Нерюнгри куорат, Серебряный Бор, Сангар уонна Чернышевскай бөһүөлэктэрин баһылыктарыгар бырагыраама чэрчитинэн тутуллар эбийиэктэргэ үлэ олохтоммут график быһыытынан ыытылларын тиһигин быспакка хонтуруоллуур наадата санатылынна.
Раиса СИБИРЯКОВА, “Саха сирэ” хаһыат, edersaas.ru