Хаарбах дьиэттэн дьону көһөрүү бырагыраамата салгыы үлэлиир
Быйыл балаҕан ыйын 1 күнүгэр диэри өрөспүүбүлүкэ үрдүнэн 30-тан тахса тыһ. киһи 11 тыһ. эргэ дьиэттэн (491 тыһ. кв м) көһүөҕэ. Билиҥҥи туругунан, былаантан 80-тан тахса %-на кээрэтиллэн турар.
Ити икки ыйынан олоххо киириэхтээх өрөспүүбүлүкэ былаана (490 кв. м иэннээх дьиэ) Арассыыйа үрдүнэн саамай элбэҕинэн биллэр. Маны олоххо киллэрэр, биллэр турар, судургу буолбатаҕын СӨ бырабыыталыстыбата өйдүүр этэ эрээри, төһө кыалларынан, үлэлии сатыахпыт диэн кытаанах соругу ылыммыта.
Быйыл ыам ыйыгар өрөспүүбүлүкэҕэ хаарбах дьиэттэн дьону көһөрүү бырагырааматын былаанын олоххо киллэрии хайдах бара турарын ОДьКХ-ны реформалааһыҥҥа пуонда Кэтээн көрөр сэбиэтин бэрэссэдээтэлэ Сергей Степашин уонна пуонда салайааччыта Константин Цицин билсэн барбыттара. Онно
Сергей Степашин: “Саха сирэ хаарбах туруктаах дьиэ ахсаанын хайдах баарынан эппит регион буолар. Атын регионнар хаарбах туруктаах дьиэ төһө баарын чуолкай этэртэн туттуналлар. Саха сирин салалтата бырагырааманы оҥороругар сөптөөх суолу тутуһан үлэлээтэ”, — диэн эппитэ.
Бүгүн СӨ бырабыыталыстыбата өрөспүүбүлүкэҕэ 2019 сылтан хаарбах дьиэттэн дьону көһөрүү бырагырааматын саҥа түһүмэҕин бэлэмнээн саҕалаан эрэр. Ил Дархан Егор Борисов Ил Түмэҥҥэ Анал этиитигэр бу бырагыраама салгыы үлэлиэхтээҕин туһунан эппитэ.
Саҥа түһүмэх былаанын чэрчитинэн, Саха сиригэр 1 мөл. 224700 кв м иэннээх хаарбах дьиэттэн дьон көһөрүллэрэ күүтүллэр. Ол аата, 3949 хаарбах дьиэ көтүрүллэр.
Игорь Никифоров, СӨ бырабыыталыстыбатын бэрэссэдээтэлин солбуйааччы:
– Арассыыйа президенэ Владимир Путин Госдуумаҕа 2018 сыл от ыйын 1 күнүгэр диэри хаарбах дьиэттэн дьону көһөрүү бырагыраамата тохтоло суох үлэлииригэр аналлаах сокуон бырайыагын оҥоролларыгар сорудахтаабыта.
Бүгүн тустаах бырагыраамаҕа саҥа түһүмэҕи оҥорон бэлэмнии сылдьабыт.
СӨ тутууга министиэристибэтэ Ил Дархан сорудаҕынан билиҥҥи бырагырааманы олоххо киллэриигэ туох ыарахаттар көрсүллүбүттэрин анаалыстаан быһаарда. Ити чэрчитинэн, Егор Борисов хаарбах дьиэттэн көһөрүүнэн дьарыктанар федеральнай кииҥҥэ бырагыраама ирдэбилигэр Саха сирин тыйыс усулуобуйатын учуоттуулларыгар аналлаах этиилэрин РФ бырабыыталыстыбатын бэрэссэдээтэлин солбуйааччы Дмитрий Козагы кытта көрсүһүүгэ эттэ.
Манна даҕатан этэр буоллахха, былааны олоххо киллэрии болдьоҕо кылгаһа, ыраах сытар улуустарга суол-иис мөлтөҕүн, ырааҕын кыһалҕата аҥаардас Саха сиригэр эрэ буолбатах эбит. Холобур, Амур уобалаһа ити кыһалҕалартан сылтаан, былаанын 2018 сыл иккис кыбаарталыгар эрэ толорор кыахтаах. Итини тэҥэ, Тверь, Псков, Саратов уобаластара, Карелия Өрөспүүбүлүкэтэ уонна Забайкальскай кыраай графиктан биллэрдик хаалан иһэллэр.
Александр ТАРАСОВ, «Саха сирэ» хаһыат, edersaas.ru