Хаарбах дьиэттэн дьону көһөрүү бырагырааматыгар федеральнай бүддьүөттэн эһиилгиттэн саҕалаан эбии 45 млрд солкуобай көрүллүөҕүн туһунан РФ бэрэсидьиэнэ Владимир Путин “Биир ньыгыл Арассыыйа” баартыйа съеһигэр эттэ.
Владимир Путин хаарбах дьиэттэн дьону көһөрүү туһунан Анал этиитигэр хаста да бэлиэтээн турар. Билигин бырагыраама иккис түһүмэҕэ ыытылла сылдьар. Бырагыраама чэрчитинэн, 2017 сыллаахха диэри испииһэккэ киирбит хаарбах дьиэлэр көһөрүллүөхтээхтэр. Былырыын туһааннаах бырагыраамаҕа өссө эбии 50 млрд солкуобай көрүллүбүтэ.
– Билигин аны салгыы баран, 2021 сыл тохсунньу 1 күнүгэр диэри хаарбах туруктаах дьиэлэр испииһэктэринэн үлэлиэхтээхпит. Дойдубут үрдүнэн билигин да 11 мөлүйүөнтэн тахса кв м иэннээх дьиэлэр хаарбах туруктаахтар. Онон манна федеральнай бүддьүөттэн 45 млрд солкуобайы көрөргө этии киллэрэбин. Ону таһынан саҥа кыбаарталлары, түөлбэлэри тэрийиигэ хайаатар да инфраструктарата эмиэ көрүллүөхтээх: тиэргэннэри тупсаран оҥоруу, уопсастыбаннай тырааныспар сырыыларын хааччыйыы барыахтаах, – диэн иһитиннэрдэ Владимир Путин.
Аграфена КУЗЬМИНА, edersaas.ru