Хаарбах дьиэлэр олохтоохторо уонна тулаайах оҕолор саҥа кыбартыыра күлүүһүн туттулар
Промышленнай уокурук олохтоохторугар улахан үөрүү тосхойдо – куорат баһылыга Айсен Николаев Бабушкин аатынан уулусса 12/3 №-гэр тутуллубут саҥа дьиэҕэ хаарбах дьиэлэртэн көһөрүллүбүт дьоҥҥо уонна тулаайах оҕолорго кыбартыыра күлүүһүн туттарда.
Айсен Сергеевич этэринэн, 2012 сылга диэри хаарбах туруктааҕынан билиниллибит эргэ дьиэлэртэн дьону көһөрүү түмүктэнэн эрэр. Бу бырагырааманан балаҕан ыйын 1 күнүгэр диэри өссө 200 кыбартыыра үлэҕэ киллэриллиэ. Дойду президенэ Владимир Путин быһаарыытынан, бырагыраама саҥа түһүмэҕэ 2019 сылга диэри олоххо киллэриллиэҕэ.
Аныгылыы оҥоһуулаах саҥа кыбартыыра күлүүһэ 14 киһиэхэ, хаарбах дьиэттэн көһөрүллүбүт дьону таһынан, тулаайах оҕолорго бэрилиннэ. Сааһын тухары хаарбах дьиэҕэ олорбут Людмила Гаврилова:
— Мин икки хостоох кыбартыыраны ыллым. Свердлов уулусса 18 №-гэр турбут эргэ дьиэбитин былырыын көтүрбүттэрэ, онуоха тэҥнээтэххэ, саҥа дьиэбит — дыбарыас!
Тулаайах Кристина Саидова:
— Биһиги ыал сотору оҕолонуохтаахпыт, ону көрсө бу биир хостоох кыбартыыраны ыллыбыт, дьиэбит сып-сырдык, кип-киэҥ, олус үөрдүбүт. Мин тулаайах оҕо быһыытынан уочаракка 2014 сыллаахха турбутум, уһуннук кэтэспэтим. Төлөпүөннээбиттэригэр, бастаан төрүт итэҕэйбэтэҕим. Куораппыт баһылыгар Айсен Николаевка, куорат дьаһалтатын дьиэҕэ-уокка сыһыаннаһыы департаменын начаалынньыгар Игорь Ткаченкоҕа, бары тутааччыларга ис сүрэхпиттэн махтанабын!
Раиса СИБИРЯКОВА, “Саха сирэ” хаһыат, edersaas.ru