СӨ Тутуутун министиэристибэтин иһинэн саҥа тэриллибит «Олорор дьиэ тутуутун дириэксийэтин» Игорь Ткаченко салайыаҕа. Саҥа салайааччыны тустаах биэдэмистибэ кэлэктиибигэр бырабыыталыстыба бэрэссэдээтэлин солбуйааччы Кирилл Бычков билиһиннэрдэ.
edersaas.ru
Игорь Ткаченко урукку өттүгэр Дьокуускай куорат Олорор дьиэ-уот департаменын салайааччыта этэ. Ол кэмҥэ саахалланар туруктаах дьиэлэр 2012 сыл тохсунньу 1 күнүгэр диэри испииһэктэрэ оҥоһуллан, докумуоҥҥа киирбит хаарбах дьиэттэн дьону көһөрүүнү сүрүннээн ыыппыта.
2019 сылтан 2024 сылга диэри хаарбах дьиэттэн дьону көһөрүү иккис түһүмэҕэ салҕанан барыаҕа. Кэлэр биэс сыл иһигэр 2012 — 2017 сыл саҥатыгар диэри докумуоҥҥа киирбит эргэрбит, эмэҕирбит дьиэттэн дьону көһөртүөхтэрэ. Урукку бырагырааманы кытта тэҥнээтэххэ, саахалланар туруктаах дьиэ икки төгүл элбэх. Өрөспүүбүлүкэҕэ 920, 09 тыһыынча кв.м иэннээх хаарбах дьиэттэн дьону көһөрөргө 61 млрд солкуобай көрүлүннэ.
Тыырыллыбыт үбү кииннээн, дьону түмэ тардан, хаарбах дьиэттэн олохтоохтору кэмигэр уталыппакка эрэ көһөрүүнэн саҥа тэриллибит дириэксийэ дьарыктаныаҕа. Ол туһунан СӨ Тутуутун министиэристибэтэ иһитиннэрэр.
Марианна Тыртыкова, «Саха сирэ», edersaas.ru