Сааскы ичигэс сибиэһэй салгыҥҥа киһи эрэ күүлэйдиэн баҕарар. Бүгүн киин куорат 202-с түөлбэтигэр «Хотугу дьүкээбил» хаар уонна муус паарката аһылынна.
Бу туһунан СИА-ҕа паарка администратора Вилен Старостин иһитиннэрдэ:
— Быйыл муустан уонна хаартан 40 оҥоһук турда. Манна Саха АССР 100 сылыгар аналлаах оҥоһук үгүс. Маны таһынан, киинэ дьоруойдара биһиэхэ кэлбит ыалдьыттары көрсөллөр. Ол курдук, пааркаҕа «Кинг Конгтан» саҕалаан, «Снайпер Саха» киинэ дьоруойдарыгар тиийэ көрүөххэ сөп.
Кафеҕа QR-кодунан киирэллэр. Оттон таһырдьа төһө баҕарар мустуохха, сылдьыахха сөп. Үгэс быһыытынан, таһырдьа араас саататар оонньуулар бары бааллар. Оҕо билиэтэ — 200, улахан киһи — 300, элбэх оҕолоох ыалга: оҕолорго — 150, улахан дьоҥҥо — 250 солкуобай. 5-гэр диэри саастаах оҕоҕо уонна төрөөбүт күннээххэ — босхо.
Елена ПОТОЦКАЯ, “Саха сирэ” хаһыат, edersaas.ru
Хаартыска — Мария Всильева, СИА.