Быйыл социальнай ситимнэргэ көрдөххө, Саҥа дьылы көрсө хаарынан-мууһунан эһиилги дьыл бэлиэтэ – Тымныы Оҕуһа оҥоһулла сатаата.
edersaas.ru
Оттон киин куорат бэлиэ сирдэринэн бэйэтин баҕа өттүнэн Тымныы Оҕуһу оҥорторон туруорбут киһи хаһааҥҥыттан «оҕуһунан ыалдьыбытын» туһунан билэр өссө интэриэһинэй.
Түмэл, тыйаатыр «оҕустара» — саҕалааһын эрэ
Анатолий Владимиров-Богослов Мэҥэ Хаҥалас Бэдьимэтиттэн төрүттээх. Кини оҕус тиэмэтигэр хайдах «ылларбытын» туһунан бу курдук кэпсиир:
— Сэттэбэр диэри эбээбэр Марфа Холмогороваҕа-Владимироваҕа иитиллибитим. Кини сахалыы итэҕэллээх этэ. Оҕо сааспар миигин саха кыһыныгар, тымныытыгар сыһыаннааҕы кэпсээн, остуоруйалаан улаатыннарбыта. Ордук Тымныы оҕус туох суолталааҕын быһаарбыта, миэхэ билиҥҥэ диэри өйбөр-санаабар баар. Дьиэбитигэр олох былыргы Оҕус халандаара баара. Ол ойуутун быйыл тупсаран, аныгылыы оҥорон, саха халандаарын оҥорбутум, улахан сэҥээрини ылла. Иитиэхтии сылдьыбыт санаабынан 2012 сыл сайыныгар доҕотторбун Сүөдэр Александрову, Уйбаан Аргунову көҕүлээн, Тымныы Оҕуһу, саха киэргэллээх аты уонна сэлиини оҥорбуппут. Ол оҥоһуктарбыт билигин Дьокуускай куораппытын киэргэтэн, «Арассыыйа – мин устуоруйам» түмэл тиэргэнигэр тураллар.
Былырыын 2019 сыллаахха эмиэ доҕотторум өйөөн, Мэҥэ Хаҥалас улууһун Наахарыттан Ефим Федотовы, Бүтэйдээхтэн Уйбаан Аргуновы кытта Тымныы оҕус оҥорбуппутун, «Киин» киинэ тыйаатырын салайааччыта Александр Данилов өйөөн, оҕуспут куораппыт саамай киинигэр турар буолбута. Быйыл, үгэс быһыытынан, эмиэ онно туруордубут. Үгүс дьон манна кэлэн хаартыскаҕа түһэн ааһалларын көрө-көрө, олус үөрэбин уонна киэн туттабын.
Баҕа санаа – муус Оҕус
Анатолий Михайлович улахан ыра санаата — Тымныы Оҕуһу Дьокуускай куорат Орджоникидзе болуоссатыгар турар сахалыы киэргэллээх харыйа анныгар, олох тыыннаах курдук мууһунан оҥоруу.
— Үс миэтирэ үрдүктээх, кып-кыһылынан көрөн, уһуутаатаҕына, муннуттан тымныы чаана тахсар, аныгылыы уоттаах-суруктаах буолуо этэ. Оччоҕо бу сибээс сайдыбыт үйэтигэр интэриниэтинэн аан дойду үрдүнэн барытынан көстөн, били Кытай Драконун курдук биллиэҕэ. Бу сахалыы, нууччалыы, английскайдыы сурук биһиги, Саха сирин олохтоохторо, хайдах курдук тыйыс усулуобуйаҕа олорорбутун барытын кэпсиир гына суруттаран бэлэмнээн сытыарабын. Быйыл Оҕус сылыгар туруортараары бары араҥаҕа кэпсэтии ыыта сатаатым, да олох кыранан кыаллыбата. Саҥа дьыл бу ыга анньан кэллэ. Онон эһиил бар дьонум өйөбүллэринэн кыаллар ини диэн, итэҕэйэбин уонна эрэнэбин, — диэн санаатын үллэстэр муус «Тымныы Оҕуһа» бырайыак ааптара.
… Олус баҕардаххына, туох барыта туолар дииллэр. Онон Оҕус сылыгар алгыс ылан Анатолий Владимиров-Богослов баҕа санаата туоларыгар баҕарабыт.
Елена ПОТОЦКАЯ, «Саха сирэ» хаһыат, edersaas.ru