«Хааннаах  Илкээни туһунан номоххо» билиэт бүппүт…

Ааптар: 
Бөлөххө киир:

Саха АССР тэриллибитэ 100 сылыгар анаан Үүнэр көлүөнэ судаарыстыбаннай тыйаатыра араас ис хоһоонноох испэктээктэри бэлэмнээн, көрөөччү дьүүлүгэр таһаарар.

Ол курдук, тыйаатыр муус устар 20 күнүгэр  Василий Яковлев-Далан «Тулаайах оҕо» арамаанынан «Хааннаах  Илкээни туһунан номох»  испэктээҕи сүрэхтиэҕэ.

Испэктээк туруорааччы режиссёра, СӨ ускуустубатын  үтүөлээх диэйэтэлэ Александр Титигиров санаатын бу курдук үллэһиннэ:

— Суруйааччы Василий Яковлев-Далан  «Тулаайах оҕо» арамааныгар олоҕуран, Саха академическай  уонна Ньурба тыйаатырадара араас ис хоһоонноох испэктээктэри туруорбуттара. Арай «Хааннаах Илкээни» кэрчик сэһэнэ ханна да испэктээк быһыытынан турбакка, «арыыланан» хаалбыт эбит. Ол да иһин буолуо, туматтар, тоҥ биистэр,  Бүлүү сүнньүгэр көһөн кэлэн олохсуйбут сахалар олохторун көрдөрөр соруктаах бу айымньыны талбыппыт.

Саха төрдө буолбут Омоҕой Өлүөнэ өрүскэ кэлиэн инниттэн ыла тумат омук диэн бэрт элбэх ахсааннаах, кыргыhылаах (өлөрсүүлээх, охсуhуулаах) туспа омук дьон олорбуттар эбит. 

Туматтар олохторун сахалартан үтүрүйтэрэн, кэнники Бүлүү өрүһүнэн Өлүөнэни таҥнары баран муора кытыытыгар киирэн олохсуйбут үһүйээннэрэ испэктээк буолан таҕыста.

Оҕолор үөрэх бырагырааматыгар  баар испэктээкиллэри көрөн, суруйааччыга уонна кини айымньытыгар  ураты болҕомтону уураллар. 

Иккиһинэн, бу сэһэн үөрэх бырагырааматыгар эмиэ баар. Ол иһин обургу оҕолорго анаммыт испэктээк буолан, киин куорат сахалыы тыллаах оскуолатын оҕото астына көрүөҕэ. 

Испэктээкиллэри үөрэнээччилэр учууталларын кытта анаан кэлэн көрөллөр. Онтон ол көрбүттэрин кылаастарыгар тиийэн ырытыһаллар. Былырыын айар үлэм  30 сылын бэлиэтээн,  Федор Достоевскай «Преступление и наказание» арамааныгар олоҕуран, «Хроника безумия…» испэктээги туруобутум.

Кэрэхсэбиллээҕэ баар,  бу күннэргэ бу испэктээк «Полюс. Золотой сезон»  диэн эрэгийиэннэр тыйаатырдарыгар аналлаах куонкурус кыайыылааҕынан буолла.   

Онон бу испэктээги көрөөччүлэр аны сайын бэс ыйыгар ыытыллахтаах  «Территория. Якутск» диэн аныгы ускуустуба бэстибээлигэр кыайыылаах испэктээктэри кытта бииргэ көрүөхтэрэ. Оттон «Хааннаах Илкээни туһунан номох испэктээги көрөөччүлэр — оскуола оҕолоро уонна кинилэр учууталлара көрдөһүүлэринэн  муус устар 30 күнүгэр хатылаан көрдөрүөхпүт.

… Ити курдук, оҕо  дууһатын кылын таарыйар испэктээктэри туруорар режиссер Александр Титигиров  ыччаты иитиигэ көмөлөөх испэктээктэрэ обургу оҕону толкуйдаталлар, сырдык санааҕа аҕалаллар. Кини туруорар испэктээктэрин ыччат сөбүлүүрүн туоһута — тыйаатырга испэктээк буолар күнүгэр билиэт бүтэн хаалара буолар.

Сарсын, муус устар 20 күнүгэр буолар испэктээккэ, билиэт эмиэ бүппүтэ ырааппыт…

Елена ПОТОЦКАЯ, «Саха сирэ» хаһыат. 

Хаартыска — Үүнэр көлүөнэ пресс-киинин тиксэриитэ.

+1
0
+1
0
+1
0
+1
0
+1
0
+1
0
+1
0