Хаандыгатааҕы техникумҥа «Полиметалл» сакааһынан обогатителлэри бэлэмнииллэр

Өрөспүүбүлүкэбит бырамыысыланнай эрэгийиэннэргэ киирэр буолан, кэлиҥҥи сылларга маркшейдердарга, обогатителлэргэ, шахтердарга, геологтарга, ыарахан уйуктаах массыына суоппардарыгар наадыйыы элбээтэ. Үгүс өттүгэр атын эрэгийиэн дьоно кэлэн үлэлииллэр.

edersaas.ru

Аҕыйах сылтан бэттэх олохтоох үөрэх кыһалара кылгас кэмнээх куурустарга үөрэтэр буолуохтарыттан, бэйэбит ыччаттарбыт бырамыысыланнаска сыстан эрэллэр. Манна мин «Полиметалл» АУо холобур аҕалыам этэ. Хампаанньа бэйэтин учаастагар олохтоох дьону үлэлэтэр санааттан, каадырдары бэйэтэ бэлэмнииллэр.

Былырыын туһааннаах хампаанньа олохтоох дьону үөрэххэ ылан эрэрин туһунан истэн олус үөрбүтүм. Атын да хампаанньалар «Полиметалл» холобурунан олохтоохтору бырамыысыланнас идэтигэр сыһыаран, бэйэлэрэ куурустарга үөрэтэллэрэ буоллар, үгүс киһи ньиэп-гаас, кыһыл көмүһү хостооһун салааларыгар сыстыа этэ.

Нежданинскайга быраактыкаланаллар

«Полиметалл»  олохтоох дьонтон обогатителлэри бэйэлэрэ бэлэмнииллэрин туһунан  филиал дириэктэрин персоналга уонна социальнай боппуруостарга солбуйааччы Наталья Чепурнова маннык кэпсээтэ:

— Биһиги уһуннук, түптээн олорон үлэлиир дьону үөрэтэн таһаарар соруктаахпыт. Өссө биир сыл анараа өттүгэр, 2019 сыллаахха СӨ Үөрэҕин уонна наукатын министиэристибэтин кытары Томпо улууһугар баар Хаандыгатааҕы хайа-геологическай техникумугар аан бастакытын «Обогащение полезных ископаемых» хайысханан үөрэтиини саҕалаабыппыт. Үс сыллаах үөрэх бырагыраамата хампаанньа туһааннаах исписэлиистэрин бэлэмнээн таһаарыаҕа. «Полиметалл» экспертэрэ эксээмэн хамыыһыйатыгар киирэллэр. Онтон устудьуоннар Нежданинскайдааҕы учаастакка, ол эбэтэр инникитин үлэлиэхтээх оробуочай миэстэлэригэр быраактыканы барыахтара. Быйыл бүддьүөт харчытыгар устудьуоннар босхо үөрэниэхтэрэ. 10 ыйдаах үөрэххэ устудьуоннары ылыы саҕаланна. Онон кэлэр сылга, бэс ыйыгар, номнуо обогатитель идэлээх үлэһиттэр буолуохтара. Эһиил сайын Нежданинскайга саҥа фабрика үлэҕэ киириэхтээх.

Онон биир сылынан үөрэҕи бүтэрбиттэр билиҥҥи кэмҥэ олус наадалаах идэни баһылыылларын таһынан, тута хамнастаах үлэ миэстэтинэн хааччыллаллар. Олус үчүгэй дии!

Сылга 5 туонна кыһыл көмүһү хостуохтара

Кыһыл көмүһү переработкалыыр произодствоҕа үлэлиир киһи техническэй наукаларга сыһыаннааҕа ордук. Обогатителлэр химияны, физиканы, математиканы үчүгэйдик билэллэр. Руудаттан көмүһү ылыы ыарахаттардаах. Уопсайынан бу салаа үчүгэйдик үөрэтиллэ илик. Онон обогатитель идэтин баһылыыр санаалаах киһи ити үөһээ этэн аһарбыт предметтэрбин биэс тарбаҕын курдук билиэхтээх.

Нежданинскайдааҕы учаастакка сылга 5 туонна кыһыл көмүһү хостуур былааннаахтар. Бу соругун олоххо киллэрэригэр «Полиметаллга» идэтийбит үлэһиттэр наадалар.

Үөрэххэ ылыы саҕаланна!

Томпо улууһугар баар Хаандыгатааҕы хайа-геологическай техникумугар «Обогащение полезных ископаемых» үөрэххэ үөрэниэн баҕалаахтар туһааннаах үөрэх кыһатын төлөпүөннэригэр: 8(41153)-43374, 8(41153)-43384 эрийэн билсиҥ.

8-924-596-69-23 (үөрэх уонна иитии боппуруостарыгар дириэктэри солбуйааччы э.т. Александра Лазаревна Диодорова) Эл.почта: gbu_ggt@mail.ru

Үөрэххэ ылыы — 2020 сыл сэтинньи 1 күнүгэр диэри.

edersaas.ru