Айылҕа барахсан ситэн-силигилээн, тупсан-киэркэйэн турар кэмэ.
edersaas.ru
Кыанардыын-кыамматтыын, эдэрдиин-эмэнниин курдаттыы тартаран күөх дуолга сылдьыан, киһи көҥүллүк тыыныан, сибэккилээх көбүөрүнэн хаамыан баҕарар күнэ-дьыла сатыылаан турар.
Мин бүгүҥҥү суруйуум дьыл хайа да кэмигэр кэрэлээҕин эттэринэн-хааннарынан билэр, өйдөрүнэн-санааларынан өйдүүр, күн-дьыл туругуттан тутулуга суох сыалларын-соруктарын (чөл туруктаах, эт-хаан уһуктуутун) толорор далбардар тустарынан. Кинилэр тустарынан былырыын эмиэ суруйбутум. Бу сырыыга дьон-сэргэ көрдөһүүтүнэн хатылыыбын. Дьэ, эрэ кинилэр кимнээҕий?
Биэс сыл устата бу дьахталлар сарсыарда аайы хаалыктаах хаама сылдьан, дьалаҕай санаалаах, айылҕаттан, тулалыыр эйгэттэн ылары эрэ билэр, ыһары -тоҕору эрэ сатыыр дьон ыспыт бөҕүн-саҕын хомуйан кэлэллэр.
Кинилэр чөл олоҕу тутуһан, кэлиҥҥи сылларга тохтообокко дьарыктанан, анал гимнастика көмөтүнэн доруобуйаларын биллэ бөҕөргөттүлэр.
Хатас нэһилиэгин бу Далбар Хотуттара күн бүгүҥҥүгэ диэри өбүгэ үгэһин тутуһан сүөһү көрөллөр, үрүҥ аһы үрүлүтэллэр, эмис эти дэлэтэллэр. Сүөгэйи, суораты, иэдьэгэйи, быыппаҕы бэйэлэрэ оҥороллор. Дьиэ кэргэттэрин сарсыарда күөрчэх ытыйар тыастарынан уһугуннараллар. Оҕуруоттарын аһын этэ да барбаккын. Кинилэринэн — олох үөһүгэр сылдьар Дарья Емельянова-Сорованан, Татьяна Жиркованан хатастар киэн туттабыт. Дарья Гаврильевна олоҕун атыы-тутуу эйгэтигэр анаата, күн бүгүн ас-үөл толору маҕаһыыннардаах. Нэһилиэккэ буолар араас таһымнаах үгүс-элбэх тэрээһиннэргэ спонсордыыр, уонунан дьону хамнастыыр дьоһун киһибит. Онтон Татьяна Григорьевна олоҕун култуураҕа анаата. Үлэтигэр чуолкайынан, туппутун хайаан да бүтэһигэр тиэрдэринэн холобур буолар киһи. Аны Татьяна уонунан сылларга ыстаастаах уопуттаах массыына ыытааччы. Массыынатыгар киирдэ да, бэйэтэ да билбэтинэн куттала суох айанныырга анаммыт курун иилинэр кэбиһэр уонна бииргэ айаннааччыларыттан ити уталыйбат быраабыланы тутуһары булгуччу ирдиир.
«Чөл олоҕу тутуһар дьоммут үксүү турдун!» — диэн санаалаах уонна ыҥырыылаах биһиги Далбар Хотуттарбытын холобурдаатым.
«Саха сирэ» хаһыат, edersaas.ru саайтка анаан
Наталья РУФОВА, Хатас.
Хаартыскаҕа ааптар түһэриитэ.