Аҕа дойду Улуу сэриитэ саҕаламмыта 75 сылын көрсө 6 №-дээх кытаанах режимнээх холуонньаҕа “Өрүү тыыннаах полк” диэн тэрээһин аан бастакытын ыытылынна.
Ити күн манна буруйдарын боруостаан олорооччулартан сүүсчэкэ киһи сэрии толоонугар охтубут эһээлэрин, аймахтарын мэтириэттэрин уонна георгиевскай лиэнтэни туппутунан, холуонньа устун хааман, буойуттарга анаммыт пааматынньык таһыгар кэлэн тохтоотулар.
Тэрээһиҥҥэ ыҥырыллыбыт бэтэрээннэр ол уоттаах сыллары ахтан-санаан аһардылар, холуонньа салалтатыгар болҕомтотун иһин махтал тылларын эттилэр. Кинилэргэ анаан хаайыылаахтар сэрии сылларынааҕы ырыалары толордулар.
Ыраахтан кэлбит ыалдьыт, Россия Накаастабылы толорор федеральнай сулууспатын холбоһуктаах эрэдээксийэлэрин хаартыскаҕа түһэрээччи — кэрэспэдьиэнэ Юрий Тутов бу тэрээһин үрдүк таһымнаахтык ыытыллыбытын бэлиэтээтэ.
“Өрүү тыыннаах полк” эһиил атын холуонньаларга эмиэ ыытыллара былааннанар.
Вера МАКАРОВА.
Ааптар хаартыскаҕа түһэриитэ.
“Саха сирэ” 2016 сыл бэс ыйын 23 күнэ.